Hyundai kompaniyasi o‘lchami jihatidan uch eshikli Lada Niva Legend kabi bo‘lgan ixcham krossoverining tizeri bilan bo‘lishdi. Hozircha zavod ichida AX1 deya nomlangan model yumaloq shakldagi noodatiy faralar hamda ko‘plab uchburchaklardan iborat tasvirlar tushirilgan orqa fonarlarga ega bo‘ladi, deb yozadi Motor.
Yangi model haqida hozircha ma’lumotlar juda kam. Katta ehtimol bilan krossoveer K1 arxitekturasida qurilgan, shuningdek, uning asosini Santro va Auro tashkil etgan bo‘lishi mumkin. Mashina kapoti ostidan hajmi 1,1 yoki 1,2 litr bo‘lgan ikkita benzin motordan biri o‘rin olgan. AX1 mutlaqo old uzatmali bo‘ladi, uning to‘liq uzatmali varianti yaratilmaydi.
Oldinroq e’lon qilingan suratlarda krossover ixcham Hyundai Venue’ni yodga solgan edi, biroq yangi tizerga ko‘ra, AX1 nostandart ikki qavatli optikaga ega esda qolarli dizaynga ega bo‘ladi. Shu bilan birga, yangi model Venue’dan bir pog‘ona pastda bo‘lib, u Hyundai lineykasidagi eng ixcham krossoverga aylanadi. Dastlabki ma’lumotlarga ko‘ra, mashinaning uzunligi 3,7—3,8 metrni tashkil etadi.
Krossoverni yig‘ish bilan Janubiy Koreyaning Kvanju shahridagi Hyundai Motor Company zavodi shug‘ullanib, bu yerda ushbu modeldan yiliga 70 ming nusxa ishlab chiqariladi. Norasmiy ma’lumotlarga ko‘ra, modelning boshlang‘ich narxi 7 million vonni (6,2 ming dollar) tashkil etadi.
Avvalroq Hyundai Creta’ning yetti o‘rindiqli versiyasining rasmiy videosi paydo bo‘lgani to‘g‘risida xabar berilgandi.
Izoh (0)