AQSh emlanganlarda tromboz aniqlangandan keyin Johnson & Johnson vaksinasidan foydalanishni to‘xtatdi. Yevropa va Janubiy Afrikada vaksinani qo‘llashni boshlash keyinga qoldirildi

AQSh oziq-ovqat va farmatsevtika bo‘limi (FDA) hamda Kasalliklarni nazorat qilish va oldini olish markazi (CDC) Johnson & Johnson kompaniyasining koronavirusga qarshi vaksinasidan foydalanishni to‘xtatishni tavsiya qildi, deb yozadi Meduza.

Kuzatuv regulyatorlarining qo‘shma bayonotiga ko‘ra, ushbu preparat bilan emlanganlarning olti nafarida vaksinatsiyadan keyin tromblar hosil bo‘lgani aniqlangach, shunday qaror qabul qilindi. Tromblar 18 yoshdan 48 yoshgacha bo‘lgan ayollarda paydo bo‘lgan va uning belgilari 6-13 kundan keyin yuzaga chiqqan. Ayollardan biri vafot etgan, yana biri og‘ir ahvolda shifoxonaga yotqizilgan.

Johnson & Johnson vaksinasi bilan emlangan bemorlarda qon tromblari hosil bo‘lish holati juda kam uchraydi, deyiladi bayonotda. Shu bilan birga, regulyatorlar tekshiruv tugamaguncha vaksinadan foydalanmaslik kerak, degan fikrda.

AQShda Johnson & Johnson bilan emlangan bir nechta kishida qon tromblari hosil bo‘lgani haqidagi xabarlardan so‘ng, Yevropada mazkur vaksinadan foydalanish kechiktirildi. Bu haqda kompaniya veb-saytida xabar berilgan.

“Mahsulotimizdan foydalanadigan odamlar xavfsizligi va farovonligi bizning ustuvor vazifamizdir. Bizning COVID-19 vaksinamizni qabul qilganlarning juda ozchiligida trombotsitlar miqdori kamligi bilan bog‘liq juda kam uchraydigan tromboz hosil bo‘lganidan xabardormiz. AQSh Kasalliklarni nazorat qilish markazi (CDC) va Oziq-ovqat va farmatsevtika bo‘limi (FDA) AQShda 6,8 milliondan ortiq dozada qabul qilingan vaksinadan yuzaga kelgan oltita asoratni ko‘rib chiqmoqda”, — deyiladi kompaniya xabarida.

“Bundan tashqari, biz ushbu holatlarni Yevropa sog‘liqni saqlash organlari ishtirokida ham ko‘rib chiqmoqdamiz. Shu sababli biz Yevropada o‘z vaksinamizni joriy etishni keyinroqqa qoldirishga qaror qildik”, — deya kompaniyada “ushbu ma’lumotni tibbiyot mutaxassislari va jamoatchilik o‘rtasida ochiq tarqatilishini” qat’iy qo‘llab-quvvatlashlarini qo‘shimcha qildi.

Janubiy Afrikada ham Johnson & Johnson vaksinasidan foydalanish vaqtincha to‘xtatildi. Vaksinani rad etish Afrikaning koronavirusdan eng ko‘p aziyat chekkan ushbu mamlakatida emlash kampaniyasini kechiktiradi.

“Biz qonda tromblar hosil bo‘lishi va Johnson & Johnson vaksinasi o‘rtasidagi sababiy bog‘liqlik obdon o‘rganilgunga qadar undan foydalanishni to‘xtatib turishga qaror qildik”,  — dedi Janubiy Afrika sog‘liqni saqlash vaziri Zveli Mxize.

Janubiy Afrika regulyatori ikki hafta oldin Johnson & Johnson vaksinasini ma’qullagan edi, ammo hozirga qadar preparat faqat tadqiqot doirasida tibbiyot xodimlariga tatbiq etilib kelinayotgan edi.

Ma’lumot uchun Johnson & Johnson kompaniyasining vaksinasidan foydalanish AQShda fevral oyida, Yevropa Ittifoqida esa mart oyida tasdiqlangan. 12-aprel holatiga ko‘ra, Johnson & Johnson AQShga 6,8 million dozadagi vaksinani yetkazib bergan.

Johnson & Johnson vaksinasi hozirgi kunda butun dunyoda qo‘llanilayotgan boshqa ko‘plab vaksinalardan faqrli ravishda ikkita emas, bitta dozada yuboriladi. Rossiyaning “Sputnik Layt” vaksinasi singari adenovirusning 26-serotipi asosida ishlab chiqarilgan mazkur vaksina hali  keng qo‘llanilishni boshlamagan. “Sputnik Layt” Rossiyada eng ko‘p ishlatiladigan ikki komponentli “Sputnik V” vaksinasining birinchi komponentidir.