Misrda 24-yanvar, yakshanba kuni COVID-19’ga qarshi vaksinatsiya boshlandi, birinchi bo‘lib tibbiyot xodimlari bepul emlandi, deb xabar bermoqda “Interfaks”.

Foto: BBC

“Tibbiyot xodimlarining barchasi emlanadi, bu ularning huquqidir”, — dedi Misr sog‘liqni saqlash vaziri Xala Zayd.

Vazirning so‘zlariga ko‘ra, tibbiyot xodimlaridan keyin keksalar va surunkali kasalligi mavjud bemorlar emlanadi. Uning ta’kidlashicha, mablag‘i yetarli fuqarolarga vaksina tekinga berilmaydi.

Vazir, shuningdek, Qohiraning Buyuk Britaniya, Xitoy va Rossiya kompaniyalari bilan taxminan 100 million dozadagi vaksina yetkazib berish bo‘yicha shartnomalar imzolaganini aytdi.

Uning qo‘shimcha qilishicha, Misr vaksinani to‘g‘ridan to‘g‘ri mamlakatning o‘zida ishlab chiqarish hamda uni boshqa Afrika davlatlariga yetkazib berish imkoniyati ustida ishlamoqda. Vazir gap qaysi vaksina haqida ketayotganiga aniqlik kiritmadi.

Yanvar oyi boshida Qohira 40 million dozagacha — asosan, AstraZeneca kompaniyasi ishlab chiqargan vaksina yordamida mamlakat aholisining 20 foizini emlamoqchiligi aytilgandi.

Jons Hopkins universteti ma’lumotlariga ko‘ra, Misrda pandemiya boshlangandan buyon jami 161 817 kishida koronavirus infeksiyasi aniqlangan, 8959 kishi kasallikdan vafot etgan. 126,1 mingdan ortiq odam sog‘aygan.

Ommaviy axborot vositalarining ta’kidlashicha, Misr Afrika mamlakatlari orasida birinchilardan bo‘lib COVID-19’ga qarshi aholini emlashni boshladi. Seyshel orollari qit’ada koronavirusga qarshi emlashni boshlagan birinchi mamlakat bo‘ldi.

Eslatib o‘tamiz, 18-yanvardan Rossiyada koronavirusga qarshi ommaviy emlash boshlangan. Singapurda esa fevral oyidan koronavirusga qarshi bepul vaksinatsiya boshlanadi.