Serbiya poytaxti Belgrad shahrida dam olish kunlari minglab xorijliklar koronavirusga qarshi bepul emlanish uchun yetib keldi. Bu haqda Klix nashriga tayanib, “Korrespondent.net” xabar berdi.
Bosniya, Chernogoriya va Shimoliy Makedoniya aholisi vaksinatsiya bosh markazi oldida uzun navbatga saflandi.
Serbiyaning chegaralariga kirishda avtomobillardan iborat navbat kuzatildi.
Axborot texnologiyalari va elektron hukumat masalalari bo‘yicha idora direktori Mixayl Yovanovichning so‘zlariga ko‘ra, Serbiyada uch kun ichida 22 mingdan ortiq chet ellik emlandi.
“Chet elliklarni vaksinatsiya qilish Serbiya fuqarolarini emlashga hech qanday xalaqit bermadi, chunki 28 mingdan ortiq fuqarolarimiz shu paytgacha ‘Sputnik V’, SinoPharm va Pfizer vaksinalari bilan emlandi”, — dedi Yovanovich.
Avvalroq Rossiya va Xitoyning COVID-19’ga qarshi vaksinalar yetkazib berish sohasidagi harakatlari tufayli Yevropa yangi turdagi jahon urushiga duch keldi, deb ta’kidladi Fransiya prezidenti Emanuel Makron.
Shuningdek, Parij shahrining chekkasida joylashgan mamlakatdagi eng yirik Stade de France sport arenasida koronavirusga qarshi emlash jarayoni olib boriladigan katta ko‘lamli vaksinatsiya markazi tashkil etilishi haqida xabar berildi.
Ma’lumot uchun, dunyo bo‘yicha aholini koronavirusga qarshi emlash uchun keng ko‘lamdagi ishlar davom etmoqda. Bu jarayon 132 ta davlatda olib borilmoqda va hozirgacha 400 milliondan ortiq vaksina ishlatildi. Oxirgi ko‘rsatkichga ko‘ra, bir kun davomida jami 9,64 million doza vaksina qilingan.
Izoh (0)