Жонс Ҳопкинс университети маълумотларига кўра, дунёда коронавирусга чалинганлар сони 155 миллион кишидан ошди. Айни пайтда улар 155 250 838 кишини ташкил қилмоқда.
Юқори бешликдан АҚШ (32,5 миллион), Ҳиндистон (21 миллион), Бразилия (14,9 миллион), Франция (5,7 миллион) ва Туркия (4,9 миллион) ўрин олди. Глобал ўлимлар сони эса 3 243 744 тага етди. Эслатиб ўтамиз, 150 миллион кишилик маррадан апрелнинг охирида ўтилган эди.
Ҳиндистон COVID-19 билан касалланганлар ва унинг оқибатида вафот этганлар сони бўйича янги рекордни ўрнатди. Мамлакатда сўнгги бир кеча-кундузда 412 262 кишида вирус аниқланган, 3980 киши вафот этган.Ҳиндистонда COVID-19 ҳолатлари бўйича жаҳон рекорди биринчи марта 22 апрель куни қайд этилган, шундан кейин мамлакат уни бир неча марта янгилаган эди.
Ҳиндистонда коронавирус авж олиши туфайли АҚШ у ердан америкалик давлат хизматчиларини чақириб олмоқда. «5 май куни департамент асосий персонал таркибига кирмайдиган АҚШ давлат хизматчиларининг ўз хоҳишига кўра мамлакатни тарк этишига рухсат берилди», — дейилади АҚШ Давлат департаменти тавсиясида.
Канадада коронавирусга қарши Pfizer/BioNTech вакцинасидан 12—15 ёшдаги болаларни эмлашда фойдаланишга рухсат берилди. Шу тариқа Канада ўсмирларни эмлашга расман рухсат берилган биринчи мамлакатга айланди. 16 ёшдан ошган вояга етмаганлар Канадада 2020 йил декабридан буён эмланиб келади.Pfizer/BioNTech вакцинасининг 2260 нафар 12—15 ёшли болаларда олиб борилган клиник синовлари натижаларига кўра, у иккиламчи таъсирлар кузатилмаган ҳолда 100 фоизлик самарадорликни намоён қилди.
Сербияда 31 майга қадар коронавирусга қарши эмланган 16 ёшдан ошган фуқароларга 3 минг динор (30 доллар) миқдорида молиявий ёрдам тақдим этилади. Бу ҳақда мамлакат президенти Александр Вучич маълум қилган.«Биз масъулиятни намоён қилган одамларни қандай мукофотлаш ҳақида бош қотирдик», — деди у. Президент, шу билан бирга, вакцина олмайдиганларга нисбатан бирор салбий чора кўриш мумкин эмаслигини айтди.
Сербия ҳукумати май охиригача ҳеч бўлмаганда 3 миллион киши биринчи дозани олиб бўлишига ва мамлакатда жамоавий иммунитет шаклланишига умид қилмоқда.
Мисрда коронавирус тарқалиши туфайли ҳукумат яна қатъий локдаун жорий қилишга мажбур бўлди. Локдаун 6 майдан бошлаб икки ҳафтага киритилади, бу вақт оралиғида савдо марказлари, дўконлар, ресторанлар ишламайди. Шунингдек, оммавий йиғинлар ва концертлар ҳам тақиқ остига тушди. Пляж ва боғлар 12—16 май кунлари ёпиқ бўлади.Мамлакат бош вазири Мустафо Мадбулий ниқоб тақиб юриш мажбурияти ҳақида эслатди ҳамда шу пайтгача ниқоб режимига риоя қилмаган 1,7 миллион киши 50 Миср фунти (3 доллар) жаримага тортилганини айтиб ўтди.
Мавзуга доир: Мисрда коронавирусга қарши эмлаш бошланди
Изоҳ (0)