Toshkentdagi Yoshlar ijod saroyida 24-aprel kuni tashqi reklama bannerlari bilan bog‘liq muammolar muhokamasiga bag‘ishlangan “Tashqi reklama: Qonun va aholi manfaatlari ustuvorligi” mavzusidagi ochiq muloqot o‘tkazildi. O‘zbekiston Elektron ommaviy axborot vositlari milliy assotsiatsiyasi tomonidan o‘tkazilgan ochiq muloqotda Oliy Majlis Qonunchilik palatasi deputati Rasul Kusherbayev ham ishtirok etib, yo‘l bo‘ylariga har qanday reklama konstruksiyalari o‘rnatilishiga qarshi ekanligini bildirdi.
Mana hozir aynan tashqi reklama vositalarini yo‘l bo‘ylariga joylashtirish qanchalik o‘sha ozgina foyda olaman, deb qoganlarga qanchalik zarar yoki xalaqit berayotganligi haqida gap ketyapti. To‘grisi, men taklif bergan bo‘lardim (bu qanchalik to‘g‘ri, o‘sha mazkur hokimlik bosh qotirib o‘ylab ko‘rishi kerak) — umuman yo‘l bo‘yiga reklama vositalarini qo‘ydirmaylik, juda qattiq xalaqit beradi haydovchiga. Chunki yo‘l bo‘yida ketayotgan vaqtingizda judayam axborot ko‘p, informatsiya ko‘p. Haydovchini chalg‘itadigan judayam ko‘p shunaqa axborotlar. Ya’ni yo‘l bo‘yida ketayotib, reklamani o‘qiydimi yoki yo‘lga qaraydimi yoki yo‘lni kesib o‘tayotganga yoki svetoforga qaraydimi? Ayrim bir chorrahalardagi svetoforga qarayman desangiz, belgilar yana jimir jimir qilib aylanib turadiganlari bor, judayam xalaqit beradi aslida.Deputat, shuningdek, zamonaviy xorij shaharlaridagi yo‘llarda bunday vositalar deyarli yo‘qligini aytib, ozgina daromad fuqarolar uchun paydo bo‘layotgan xavfni oqlamasligini ta’kidlagan.Buni boshqa joylarini topish kerak, ya’ni yo‘l bo‘yidan tashqari, boshqa odamlar gavjumroq yuradigan, ko‘proq boradigan boshqa joylar ham bor-ku, balki shu bilan cheklanish kerakdir? Kerakmas umuman yo‘l bo‘yiga qo‘yish. U bannerli bo‘ladimi, bannersiz bo‘ladimi, boshqa imkon doirasida, bizga nima kerak yo‘lda shu imkon doirasida yo‘l harakatlanishini tartibga soladigan ego bo‘lishi kerak yoki yo‘naltiruvchi belgilar, ya’ni ‘uyoqqa borsang, manabu obyektga borasan’. Bundan ortig‘i haydovchiga og‘irlik ham qiladi.
Hozir mana ko‘rdik, bir-ikkita holatni. O‘zimiz sun’iy ravishda tashkil qilgan mana shunaqa harakatlar oqibatida kimlarningdir o‘limigacha ham olib kelyapti. Yo‘l bo‘yidan boshqa joylarga reklamalarni joylash haqida ko‘proq o‘ylaylik, ko‘proq shuning ustida ishlaylik. Bu belgilanayotgan, tanlanayotgan joylarda ochiqlik, shaffoflik, alohida toifalarga imtiyoz bermaslik masalasini kuchaytirish kerak.
Oliy Majlis Qonunchilik palatasi deputati Rasul Kusherbayev
Eslatib o‘tamiz, Toshkentda tashqi reklama konstruksiyalarini xatlovdan o‘tkazish, yagona elektron reyestrni shakllantirish maqsadida tashqi reklama obyektlariga moratoriy joriy etildi. Ushbu taqiq 2021-yilning 1-aprelidan 31-dekabrigacha amal qiladi.
Ijtimoiy tarmoqlarda Toshkent shahrida yuzlab tashqi reklama konstruksiyalari hech qanday huquqiy asoslar ko‘rsatilmasdan buzib tashlanayotgani haqida xabarlar tarqalgach, Prezident huzuridagi Tadbirkorlik subyektlarining huquqlari va qonuniy manfaatlarini himoya qilish bo‘yicha vakil tashqi reklama konstruksiyalari buzib yuborilishining qonuniyligini o‘rganishga kirishdi. Savdo-sanoat palatasi reklama bannerlari nima sababdan buzilayotganiga oydinlik kiritish maqsadida Toshkent hokimligiga so‘rov yubordi.
Izoh (0)