2020-yilning 30-iyulida Qashqadaryo viloyati Shahrisabz shahrida yashovchi erkak shaxsiy avtomobilida o‘ziga qo‘shib uch nafar farzandi va turmush o‘rtog‘ini yoqib yuborgani haqida xabar berilgandi.
O‘shanda fuqaro N.S. turmush o‘rtog‘i Z.O. hamda farzandlari bilan o‘ziga tegishli avtomashinada tog‘asining uyidan qaytayotgan vaqtda turmush o‘rtog‘i bilan tortishib qolgan. Fuqaro oilaviy janjal sabab avtomobilini yo‘l chetida to‘xtatib, eshiklarini qulflagan holda mashinada bo‘lgan benzin yoqilg‘isini o‘zi, turmush o‘rtog‘i va farzandlarining ustiga sepib, yoqib yuborgan.
Hodisa joyiga yetib kelgan fuqarolar ko‘magi bilan N.S., turmush o‘rtog‘i Z.O., o‘g‘li I.N. va qizi S.K. tuman tibbiyot birlashmasiga olib borilgan. Biroq erkakning qizi Sh.K. avtomashinada qolib ketganligi sababli hodisa joyida vafot etgan. N.S.ning o‘zi, turmush o‘rtog‘i va farzandlari ko‘rsatilgan tibbiy yordamga qaramasdan shu kuni tuman tibbiyot birlashmasining jonlantirish bo‘limida vafot etgan edi.
23-aprel kuni bo‘lib o‘tgan Senatning o‘n to‘rtinchi yalpi majlisidagi hisobotida bosh prokuror Nig‘matilla Yo‘ldoshev jinoyatchilikka qarshi kurashish haqida to‘xtalib, ushbu hodisani ham tilga olib o‘tgan.
Jumladan, bosh prokuror jinoyatchilikka qarshi kurashish samaradorligini oshirishda davlat idoralari, mahalla, keng jamoatchilik o‘rtasidagi hamkorlik bekam-ko‘st yo‘lga qo‘yilmagani, huquqbuzarlikka murosasiz muhit to‘la shakllantirilmaganini qayd etgan.
Narimov turmush o‘rtog‘i bilan kelishmovchilik oqibatida avtomashinasiga o‘zini, turmush o‘rtog‘ini hamda 6, 11 va 12 yoshli 3 nafar go‘dak farzandini qamab, ustilariga benzin sepib, vahshiylarcha yoqib yuborgan. Oqibatda butun oila fojia qurboniga aylandi.Nig‘matilla Yo‘ldoshevning hisobotidan so‘ng ish yakunini bilish uchun yuborilgan “Daryo” so‘roviga javoban Bosh prokuratura axborot xizmati rahbari Hayot Shamsutdinov ushbu hodisa yuzasidan yakuniy ma’lumotni taqdim etdi.Jinoyat sabablari o‘rganilganda, er-xotin o‘rtasida rashk tufayli uzoq muddat o‘zaro kelishmovchilik, urish-janjallar davom etib kelgani aniqlandi. Buning ustiga, Narimov muqaddam sodir etgan jinoyati uchun Shahrisabz shahri probatsiya xizmati hisobida ham turgan.
Bundan qo‘ni-qo‘shnilar, mahalla-ko‘y va qarindosh-urug‘ to‘la xabardor bo‘lsa-da, oiladagi ziddiyatlarni bartaraf qilish choralarini ko‘rmagan, profilaktika inspektori ham, boshqalar ham bunga e’tibor bermagan.
Nig‘matilla Yo‘ldoshev, bosh prokuror
Ma’lumotda yozilishicha, tergov harakatlari natijasiga ko‘ra, Shahrisabz shahar, “Guliston” MFY sobiq raisi H.Omonov, Shahrisabz shahar IIB XPB TP profilaktika inspektori J.Mo‘minov, profilaktika katta inspektori A.Fayzullayev, Shahrisabz shahar IIB probatsiya katta inspektori D.O‘rinovga oid qismi ularning harakatlarida biror jinoyat tarkibi bo‘lmaganligi sababli Jinoyat-protsessual kodeksining 83-moddasi 2-bandiga asosan jinoyat ishining bir qismi sifatida harakatdan tugatilgan.
Jinoyat ishi S.N.ning harakatlarida Jinoyat kodeksining 97-moddasi 2-qismi “a, v, j” bandlarida ko‘rsatilgan jinoyat alomatlari mavjud bo‘lsa-da, u vafot etganligi sababli Jinoyat-protsessual kodeksining 84-moddasi 1-qismi 3-bandiga asosan harakatdan tugatilgan.
Izoh (0)