Savdo-sanoat palatasi reklama bannerlari nima sababdan buzilayotganiga oydinlik kiritish maqsadida Toshkent hokimligiga so‘rov yubordi
19-aprel kuni O‘zbekiston Savdo-sanoat palatasiga Reklama industriyasi milliy assotsiatsiyasining tadbirkorlik subyektlariga mulk huquqi asosida tegishli bo‘lgan Toshkent shahridagi tashqi reklama obyektlari (konstruksiyalari) noma’lum sabablarga ko‘ra buzib tashlanayotganligi to‘g‘risidagi murojaati kelib tushgan. Bu haqda palata matbuot xizmati xabar berdi.
Palata tomonidan zudlik bilan ushbu masalani tekshirish va tadbirkorlarning xususiy mulkini himoya qilish maqsadida Bosh prokuraturaga xat yuborilgan. Shuningdek, masalaga oydinlik kiritish maqsadida reklama obyektlarini demontaj qilishga asos bo‘lgan huquqiy hujjatni va shunga oid boshqa ma’lumotlarni olish yuzasidan Toshkent shahar hokimligiga so‘rov yuborilgani aytilmoqda.
Ta’kidlanishicha, hozirda palataga a’zo bo‘lgan 2 nafar tadbirkordan ushbu masala yuzasidan kelib tushgan murojaatlar asosida sudlarga da’vo arizalar kiritish masalasi ko‘rib chiqilyapti.
“Shu bilan birga, yuqorida keltirilgan holatlardan jabr ko‘rgan tadbirkorlik subyektlari o‘z huquq va qonuniy manfaatlarini sud orqali himoya qilish maqsadida da’vo arizalar kiritish yuzasidan Savdo-sanoat palatasiga murojaat qilishlari mumkin”, — deyiladi SSP xabarida.
Avvalroq ijtimoiy tarmoqlarda Toshkent shahrida yuzlab tashqi reklama konstruksiyalari hech qanday huquqiy asoslar ko‘rsatilmasdan buzib tashlanayotgani haqida xabarlar tarqalgandi. Biznes-ombudsman Toshkentdagi reklama bannerlarining buzib yuborilishi qonuniyligini o‘rganishni boshlagan.
