Toshkentda 8-apreldan boshlab reklama konstruksiyalari ommaviy buzib tashlanayotgani jamoatchilik o‘rtasida turli mazmundagi bahs-munozaralarga sabab bo‘lmoqda. 24-aprel kuni mazkur mavzu doirasida O‘zbekiston Elektron ommaviy axborot vositlari milliy assotsiatsiyasi tomonidan o‘tkazilgan ochiq muloqotda tashqi reklama obyektlari bo‘yicha o‘tkazilgan davra suhbatida har bir soha mutasaddilari tashqi reklama obyektlari nega buzilayotganiga javob berdi. Bu haqda “Rost24” xabar berdi.
Ichki ishlar vazirligi Yo‘l harakati xavfsizligi bosh boshqarmasi o‘rinbosari Erali Bozorov tartibsiz o‘rnatilgan reklama konstruksiyalari yo‘l harakati xavfsizligiga salbiy ta’sir ko‘rsatib, fuqarolarimiz hayoti, sog‘lig‘i va mol-mulkiga jiddiy xavf solayotganini alohida ta’kidlab o‘tdi.
Davlat soliq qo‘mitasi raisi o‘rinbosari Mirziyod Mahkamov ayrim tadbirkorlik subyektlari tomonidan tashqi reklama faoliyatida soliq bazasi yashirilayotgani, soliqlar o‘z vaqtida to‘lanmayotgani, bu esa budjetga tushumlarning pasayishiga sabab bo‘layotgani, natijada ijtimoiy soha dasturlarini amalga oshirishda muammolar paydo bo‘layotganini ma’lum qildi.
Qurilish vaziri boshqarma boshlig‘i B.Sodiqov o‘z chiqishida tashqi reklama konstruksiyalarini o‘rnatishda shaharsozlik normalari va qoidalariga yetarli darajada rioya etilmayotgani, shaharlarning tashqi qiyofasi va ko‘rkiga rahna solinayotganini qayd etdi.
Favqulodda vaziyatlar vazirligi boshqarma boshlig‘i Davron Qambarov tashqi reklama konstruksiyalari noqulay ob-havo sharoitlari, jumladan, kuchli shamol va yog‘ingarchiliklar ta’sirida fuqarolarning hayoti va mol-mulkiga xavf solayotgani, ushbu konstruksiyalar favqulodda vaziyatlarda qutqaruv ishlariga to‘sqinlik qilayotganiga diqqatini qaratdi.
Iste’molchilar huquqlarini himoya qilish agentligi direktori Elmurot Haytmetov, jumladan, tashqi reklama konsturksiyalarini tartibga keltirish uchun tadbirkorlik subyektlariga 6 oydan ko‘proq muddat berilganini, bundan tashqari, mediatsiya asosida tashqi reklama konstruksiyalarini tartibga keltirish uchun sudlar tomonidan ham ma’lum muddat imkoniyat taqdim etilgani, lekin shunga qaramay, bir qator tadbirkorlik subyektlari tomonidan bu boradagi qonun ijrosi ta’minlanmaganiga e’tibor qaratdi.
Respublika manaviyat va ma’rifat markazi rahbari Minxojidin Hojimatovning ta’kidlashicha, ayrim tadbirkorlar ko‘proq daromad olish maqsadida tashqi reklama vositalarida millatimiz timsoliga aylangan Alisher Navoiy, Zahiriddin Muhammad Bobur va boshqa ulug‘ mutafakkirlarimizning tabarruk siymolaridan bachkana usullar orqali foydalanishga urinmoqda. Xalqimiz ma’naviyati va qadriyatlariga ochiqdan ochiq bepisandlik hisoblangan bunday holatlar yurtdoshlarimizning jiddiy e’tiroziga sabab bo‘lmoqda. Shu bilan birga, yana bir qator tashkilotlar vakillari ham mavzuga oid muammolarning yechimi yuzasidan o‘zlarining taklif va mulohazalarini bildirdi.
Avvalroq Monopoliyaga qarshi kurashish qo‘mitasi mazkur vaziyatga munosabat bildirib, Vazirlar Mahkamasining “Tashqi reklama bozorini tartibga solish to‘g‘risida” 2020-yil 20-fevraldagi 104-sonli qarori bilan tashqi reklama obyektlarini (konstruksiyalarini) qurish, o‘rnatish, ularga yer ajratish, to‘lovlar miqdorini aniqlash, texnik jihatdan tartibga solish va boshqa masalalar yuzasidan yagona amal qiluvchi mexanizmlar joriy qilinganini ta’kidlagandi.
Eslatib o‘tamiz, Toshkentda tashqi reklama konstruksiyalarini xatlovdan o‘tkazish, yagona elektron reyestrni shakllantirish maqsadida tashqi reklama obyektlariga moratoriy joriy etildi. Ushbu taqiq 2021-yilning 1-aprelidan 31-dekabrigacha amal qiladi.
Ijtimoiy tarmoqlarda Toshkent shahrida yuzlab tashqi reklama konstruksiyarlari hech qanday huquqiy asoslar ko‘rsatilmasdan buzib tashlanayotgani haqida xabarlar tarqalgach, Prezident huzuridagi Tadbirkorlik subyektlarining huquqlari va qonuniy manfaatlarini himoya qilish bo‘yicha vakil tashqi reklama konstruksiyalari buzib yuborilishining qonuniyligini o‘rganishga kirishdi. Savdo-sanoat palatasi reklama bannerlari nima sababdan buzilayotganiga oydinlik kiritish maqsadida Toshkent hokimligiga so‘rov yubordi.
Izoh (0)