Biznes-ombudsman Toshkentdagi reklama bannerlarining buzib yuborilishi qonuniyligini o‘rganmoqda
O‘zbekiston Prezidenti huzuridagi Tadbirkorlik subyektlarining huquqlari va qonuniy manfaatlarini himoya qilish bo‘yicha vakil Toshkent shahrida tashqi reklama konstruksiyalari buzib yuborilishining qonuniyligini o‘rganmoqda. Bu haqda biznes-ombudsmanning Telegram kanali orqali ma’lum qilindi.
Ijtimoiy tarmoqlarda Toshkent shahrida yuzlab tashqi reklama konstruksiyarlari hech qanday huquqiy asoslar ko‘rsatilmasdan buzib tashlanayotgani haqida xabarlar tarqaldi.
“Mahalliy hokimiyat organlarining ushbu harakatlari tadbirkorlar orasida keskin noroziliklarni keltirib chiqarayotganini inobatga olgan holda, biznes-ombudsman devoni mas’ul davlat organlari ishtirokida ushbu harakatlarning qonuniyligini o‘rganib chiqmoqda”, — deyiladi munosabatda.
Avvalroq Toshkentda tashqi reklama obyektlariga moratoriy joriy qilingandi.
Eslatib o‘tamiz, 2020-yilning fevral oyida poytaxt reklamachilarning Prezident Shavkat Mirziyoyevning tadbirkorlarni qo‘llab-quvvatlash so‘zlari va tadbirkorlar faoliyatiga aralashmaslik haqida “O‘zavtoyo‘l” davlat qo‘mitasiga qaratilgan chorlov aks etgan reklama bannerlari paydo bo‘lgandi. O‘zbekiston kommunikatsion agentliklari assotsiatsiyasi bu “O‘zavtoyo‘l”ning “Toshkent halqa avtomobil yo‘li yoqasiga o‘rnatilgan 600 ga yaqin tashqi reklama konstruksiyalarini demontaj qilish” haqidagi bayonotiga nisbatan javob munosabati deb aytgandi.O‘sha yilning mart oyida Toshkent shahri ko‘chalaridagi qonun talabiga javob bermaydigan tashqi reklama obyektlariga qarshi qat’iy choralar ko‘rilgan.
