O‘zbekistonning Belarusdagi elchixonasi maslahatchisi, siyosiy fanlar doktori Doniyor Obidov koronavirus infeksiyasi oqibatida vafot etdi. Bu haqda O‘zbekiston kinematografiya agentligi bosh direktorining birinchi o‘rinbosari, adabiyotshunos olim Shuhrat Rizayev “Hurriyat” gazetasida chop etilgan maqolasida ma’lum qildi.
“Shu oyning ilk kunlarida Belarusdan xabar keldi. Minskdagi O‘zbekiston elchixonasida ishlab turgan do‘stimiz, ukamiz, siyosiy fanlar doktori Doniyor Obidov koronavirus tufayli vafot etibdi. Shavq-u zavq bilan yonib, yolqinlanib o‘zbek—belarus xalqlarining madaniy yaqinlashuvi uchun dildan xizmat qilib yurgan edi”, — deb yozgan Shuhrat Rizayev.
“Xabar.uz”ning yozishicha, diplomatning o‘limi haqidagi xabar Belarusdagi “Zvyazda” nashriyot uyi direktori Ales Karlyukevich tomonidan yuborilgan.
“Uning vafoti haqida shoir Minhojiddin Mirzo ma’lum qildi. Bunga ishonmadim. Uning do‘sti — toshkentlik jurnalist Bobur Alixonov bilan bog‘landik. ‘Ha, bu haqiqat, — dedi u. — Do‘stimiz Doniyordan ayrilib qoldik’. Minskdan maktub keldi. ‘Zvyazda’ nashriyot uyi direktori — bosh muharriri Ales Karlyukevich ‘U koronavirusdan vafot etdi’ deb yozibdi”, — degan yozuvchi Risolat Haydarova.
Jurnalist Bobur Alixonov Facebook’dagi sahifasida Doniyor Obidov vafoti haqida 6-aprel kuni ma’lum qilgan, dafn marosimi 7-aprel kuni o‘tkazilishini bildirgan.
Belarusdagi “Zvyazda” nashriyot uyi ikki davlatning madaniy-gumanitar aloqalari ravnaqiga katta hissa qo‘shgan marhum diplomat Doniyor Obidov xotirasini abadiylashtirish, jumladan, Minskdagi ko‘cha yoki maktablardan biriga uning nomini berishni taklif etgan.
Ma’lumot uchun, Doniyor Obidov 2004—2018-yillarda O‘zbekiston Respublikasi Prezidentining chet elda stipendiatlarning malaka oshirishi, stajirovka o‘tashi va ta’lim olishini tashkil etish “Iste’dod” jamg‘armasi ijrochi direktor o‘rinbosari lavozimida ishlagan. 2018-yildan to hozirga qadar O‘zbekistonning Belarusdagi elchixonasi maslahatchisi lavozimida faoliyat yuritib kelayotgan edi.
O‘zbekiston Tashqi ishlar hamda Sog‘liqni saqlash vazirliklari taniqli diplomatning vafoti haqida xabar bergani yo‘q. O‘zbekistonning Belarusdagi elchixonasi rasmiy saytida 25-aprel holatiga ko‘ra Doniyor Obidov siyosiy masalalar bo‘yicha maslahatchi maqomida turibdi.
Eslatib o‘tamiz, O‘zbekiston Sog‘liqni saqlash vazirligi 2020-yil 20-sentabr kuni Germaniyada vafot etgan bosh vazir o‘rinbosari O‘ktam Barnoyevni O‘zbekistonda koronavirus qurbonlari ro‘yxatiga qo‘shgandi. SSVning 20-sentabr yakunlari bo‘yicha e’lon qilgan kunlik hisobotida 56 yoshli O‘ktam Barnoyev bilan bog‘liq holat Toshkent shahri statistikasiga 300-o‘lim sifatida kiritilgan.
Izoh (0)