2020 йилнинг 30 июлида Қашқадарё вилояти Шаҳрисабз шаҳрида яшовчи эркак шахсий автомобилида ўзига қўшиб уч нафар фарзанди ва турмуш ўртоғини ёқиб юборгани ҳақида хабар берилганди.
Ўшанда фуқаро Н.С. турмуш ўртоғи З.О. ҳамда фарзандлари билан ўзига тегишли автомашинада тоғасининг уйидан қайтаётган вақтда турмуш ўртоғи билан тортишиб қолган. Фуқаро оилавий жанжал сабаб автомобилини йўл четида тўхтатиб, эшикларини қулфлаган ҳолда машинада бўлган бензин ёқилғисини ўзи, турмуш ўртоғи ва фарзандларининг устига сепиб, ёқиб юборган.
Ҳодиса жойига етиб келган фуқаролар кўмаги билан Н.С., турмуш ўртоғи З.О., ўғли И.Н. ва қизи С.К. туман тиббиёт бирлашмасига олиб борилган. Бироқ эркакнинг қизи Ш.К. автомашинада қолиб кетганлиги сабабли ҳодиса жойида вафот этган. Н.С.нинг ўзи, турмуш ўртоғи ва фарзандлари кўрсатилган тиббий ёрдамга қарамасдан шу куни туман тиббиёт бирлашмасининг жонлантириш бўлимида вафот этган эди.
23 апрель куни бўлиб ўтган Сенатнинг ўн тўртинчи ялпи мажлисидаги ҳисоботида бош прокурор Ниғматилла Йўлдошев жиноятчиликка қарши курашиш ҳақида тўхталиб, ушбу ҳодисани ҳам тилга олиб ўтган.
Жумладан, бош прокурор жиноятчиликка қарши курашиш самарадорлигини оширишда давлат идоралари, маҳалла, кенг жамоатчилик ўртасидаги ҳамкорлик бекам-кўст йўлга қўйилмагани, ҳуқуқбузарликка муросасиз муҳит тўла шакллантирилмаганини қайд этган.
Наримов турмуш ўртоғи билан келишмовчилик оқибатида автомашинасига ўзини, турмуш ўртоғини ҳамда 6, 11 ва 12 ёшли 3 нафар гўдак фарзандини қамаб, устиларига бензин сепиб, ваҳшийларча ёқиб юборган. Оқибатда бутун оила фожиа қурбонига айланди.Ниғматилла Йўлдошевнинг ҳисоботидан сўнг иш якунини билиш учун юборилган «Дарё» сўровига жавобан Бош прокуратура ахборот хизмати раҳбари Ҳаёт Шамсутдинов ушбу ҳодиса юзасидан якуний маълумотни тақдим этди.Жиноят сабаблари ўрганилганда, эр-хотин ўртасида рашк туфайли узоқ муддат ўзаро келишмовчилик, уриш-жанжаллар давом этиб келгани аниқланди. Бунинг устига, Наримов муқаддам содир этган жинояти учун Шаҳрисабз шаҳри пробация хизмати ҳисобида ҳам турган.
Бундан қўни-қўшнилар, маҳалла-кўй ва қариндош-уруғ тўла хабардор бўлса-да, оиладаги зиддиятларни бартараф қилиш чораларини кўрмаган, профилактика инспектори ҳам, бошқалар ҳам бунга эътибор бермаган.
Ниғматилла Йўлдошев, бош прокурор
Маълумотда ёзилишича, тергов ҳаракатлари натижасига кўра, Шаҳрисабз шаҳар, «Гулистон» МФЙ собиқ раиси Ҳ.Омонов, Шаҳрисабз шаҳар ИИБ ХПБ ТП профилактика инспектори Ж.Мўминов, профилактика катта инспектори А.Файзуллаев, Шаҳрисабз шаҳар ИИБ пробация катта инспектори Д.Ўриновга оид қисми уларнинг ҳаракатларида бирор жиноят таркиби бўлмаганлиги сабабли Жиноят-процессуал кодексининг 83-моддаси 2-бандига асосан жиноят ишининг бир қисми сифатида ҳаракатдан тугатилган.
Жиноят иши С.Н.нинг ҳаракатларида Жиноят кодексининг 97-моддаси 2-қисми «а,в,ж» бандларида кўрсатилган жиноят аломатлари мавжуд бўлса-да, у вафот этганлиги сабабли Жиноят-процессуал кодексининг 84-моддаси 1-қисми 3-бандига асосан ҳаракатдан тугатилган.
Изоҳ (0)