Shavkat Mirziyoyev O‘zbekiston Qahramoni Hasan Normurodov vafoti munosabati bilan hamdardlik bildirdi

O‘zbekiston Qahramoni Hasan Normurodov vafoti munosabati bilan mamlakat rahbariyati, jumladan, Prezident Shavkat Mirziyoyev, Oliy Majlis Senati raisi Tanzila Norboyeva, bosh vazir Abdulla Aripov, Qonunchilik palatasi raisi Nuriddinjon Ismoilov, Samarqand viloyati hokimi Erkinjon Turdimov va boshqalar hamdardlik bildirdi. Hamdardlik matni Prezident matbuot xizmati tomonidan e’lon qilindi.

O‘zbekiston xalqi og‘ir judolikka uchradi.

Atoqli davlat va jamoat arbobi, Oliy Majlis Senatining a’zosi, ‘Nuroniy’ jamg‘armasining Samarqand viloyati bo‘limi raisi, O‘zbekiston Qahramoni Hasan Norbekovich Normurodov shu yil 24-aprel kuni 82 yoshida vafot etdi.

Hasan Normurodov 1939-yil 16-noyabr kuni Samarqand viloyati Kattaqo‘rg‘on tumanida tug‘ildi. O‘rta maktabni tugatib, Kattaqo‘rg‘on pedagogika bilim yurti va Samarqand davlat universitetida tahsil oldi.

Xizmat faoliyatini o‘rta ta’lim maktabining ona tili va adabiyoti fani o‘qituvchisi lavozimidan boshlab, ko‘p yillar davomida Samarqand viloyatining turli shahar va tumanlarida ishladi.

Jumladan, Kattaqo‘rg‘on shahri, Jomboy, Narpay tumanlarida rahbarlik lavozimlarida, Samarqand viloyati partiya qo‘mitasining kotibi sifatida samarali faoliyat ko‘rsatdi.

1988—1995-yillarda Samarqand viloyati Xalq ta’limi boshqarmasi boshlig‘i, 1995—2003-yillarda Xalq ta’limi va fan xodimlari kasaba uyushmasining Samarqand viloyat kengashi raisi bo‘lib ishladi.

2003-yildan hozirgi vaqtga qadar ‘Nuroniy’ jamg‘armasining Samarqand viloyati bo‘limi raisi vazifasida fidokorona mehnat qildi.

Hasan Normurodov 60 yildan ziyod mehnat faoliyati davomida o‘zining ulkan rahbarlik salohiyati, boy bilim va tajribasi, barchaga ibrat bo‘ladigan ma’naviy fazilatlari bilan, jonajon Vatanimizga cheksiz muhabbati va sadoqati bilan haqli ravishda ko‘pmillatli xalqimizning qalbidan chuqur joy olgan ulug‘ inson edi.

Uning bevosita rahbarligida Samarqand viloyatining turli hududlarini iqtisodiy-ijtimoiy rivojlantirish va obodonlashtirish, aholining turmush darajasini yaxshilash, ta’lim-tarbiya tizimining samaradorligini oshirish bo‘yicha ulkan ishlar amalga oshirildi.

Hasan Normurodov haqiqiy xalq oqsoqoli sifatida hamisha el-yurtning dard-u tashvishlari bilan yashadi. Ayniqsa, keksa avlod vakillari, xotin-qizlarimizning huquq va manfaatlarini himoya qilish, ular uchun munosib sharoit yaratish, aziz yoshlarimizni milliy va umuminsoniy qadriyatlar ruhida tarbiyalash, ularning kelajagini ta’minlash yo‘lida chinakam fidoyilik ko‘rsatib, sidqidildan xizmat qildi.

U Oliy Majlisi Senatining a’zosi sifatida mustaqilligimizni mustahkamlash, mamlakatimizda parlamentarizm tizimini rivojlantirish, ijtimoiy-iqtisodiy taraqqiyotimiz uchun zarur bo‘lgan muhim qonunlarni ishlab chiqish va amalga oshirishga katta hissa qo‘shdi.

Hasan Normurodovning davlatimiz va xalqimiz oldidagi ulkan xizmatlari munosib taqdirlandi. U ‘Do‘stlik’, ‘Mehnat shuhrati’, ‘El-yurt hurmati’ ordenlari, ‘O‘zbekiston Qahramoni’ degan yuksak unvon bilan mukofotlangan edi.

Xalqimizning ulug‘ farzandi, atoqli davlat va jamoat arbobi, samimiy va fidoyi inson Hasan Normurodovning yorqin xotirasi qalblarimizda hamisha saqlanib qoladi.

Sh.Mirziyoyev, T.Norboyeva, N.Ismoilov, A.Aripov, E.Turdimov, S.Turdiyev