O‘zbekistondagi “tez yordam”ga amalga oshirilgan chaqiriqlarning qariyb 1900 tasi asossiz bo‘lib chiqqan
2021-yilning birinchi choragida O‘zbekiston tez tibbiy yordam xizmatiga 2,7 milliondan ortiq chaqiriq kelib tushgan bo‘lib, ularning 1874 tasi asossiz chaqiriqlardan iborat. Bu haqda Sog‘liqni saqlash vazirligi matbuot xizmati xabar berdi.
Asossiz chaqiriqlar qatoridan manzil noto‘g‘ri ko‘rsatilgani, “103” brigadasiga uy eshigini ochishmagani, bemor chaqiriq manzili ko‘rsatilgan joyda emasligi yoki tez tibbiy yordamga murojaat qilinmagani kabi holatlar ko‘rsatilgan.
Asossiz chaqiriqlar bo‘yicha eng yuqori ko‘rsatkich Surxondaryo viloyatida qayd etilgan — 497 ta. Bundan tashqari, bu kabi holatlar Farg‘ona (387), Toshkent (249) va Qashqadaryo (204) viloyatlarida ham kuzatilgan.
Ta’kidlanishicha, 2020-yilning ayni shu davriga kelib, fuqarolar tomonidan tez tibbiy yordam xizmatiga 3 milliondan ziyod chaqiriq kelib tushga. Sog‘liqni saqlash vazirligi buni 2020-yildagi pandemiya sharoiti bilan bog‘lamoqda. 2020-yilning ayni shu davrida 3 mingga yaqin asossiz chaqiriq qayd etilgan. 2019-yilda esa SSV murojaatlarning “30 foizini asossiz” deb atagandi.
