Samarqand viloyati Pastdarg‘om tumanida tanishini 600 dollarga ishga kiritib qo‘ymoqchi bo‘lgan hamshira qo‘lga olindi, deya xabar qilmoqda Tergov departamenti.
Qayd etilishicha, 2021-yilning 21-aprel kuni Pastdarg‘om tuman tibbiyot birlashmasida hamshira bo‘lib ishlovchi 33 yoshli U.M. o‘zining xizmat mavqeyidan foydalangan holda, tanishi 38 yoshli S.Sh.ni tez tibbiy yordamga ishga kiritib qo‘yishni va’da qilib, ish joyida S.Sh.dan 600 AQSh dollari pul mablag‘larini olayotgan vaqtida JQB va DXX xodimlari tomonidan ushlangan.
Tadbir davomida U.M.dan kimyoviy ishlov berilgan 600 dollar pullar ashyoviy dalil tariqasida rasmiylashtirib olingan.
Mazkur holat yuzasidan Pastdarg‘om tumani IIB huzuridagi tergov bo‘limi tomonidan U.M.ga nisbatan Jinoyat kodeksining 168-moddasi 3-qismi “v” bandi (firibgarlik, ya’ni xizmat mavqeyidan foydalanib, o‘zganing mulkini qo‘lga kiritish) bilan jinoyat ishi qo‘zg‘atilib, gumon qilinuvchi tariqasida jalb qilingan.
Hozirda tergov davom etmoqda.
Bundan avval Buxoroda sevgan qizini “issiq-sovuq” qilib qaytarib berishini aytib, 31 yoshli yigitning 3 ming dollarini “uxlatgan” ayolga jinoyat ishi qo‘zg‘atilgani, Andijonda fuqaroni aldab, uning 15 million so‘m pulini olmoqchi bo‘lgan soliq bosh inspektori ushlangani hamda Samarqandda fuqaroni 50 ming dollarga chuv tushirgan advokat ustidan jinoyat ishi qo‘zg‘atilgani haqida xabar berilgandi.
Izoh (0)