Namangan shahridagi yangi qurilayotgan uylarga kanalizatsiya quvurini tortish jarayonida ikki nafar yollanma ishchi halok bo‘ldi. Bu haqda “Daryo” muxbiri Azizbek Abduvaliyev xabar bermoqda.
Hodisa 24-aprel kuni soat 13:50 atrofida shahar markazidagi Navoiy ko‘chasida sodir bo‘lgan. Viloyat Favqulodda vaziyatlar boshqarmasiga shu ko‘chada olib borilayotgan qazish ishlari davomida ikki nafar ishchi tuproq ostida qolib ketganligi haqida tezkor xabar yetkazilgan.
Zudlik bilan yetib kelgan qutqaruvchilar tuproq ostidan jabrdiydalarni chiqarib olib, tibbiyot xodimlariga topshirgan. Biroq ularning hayotini saqlab qolishning imkoni bo‘lmagan.
Dastlabki ma’lumotlarga ko‘ra, ishchilar uzunligi 5 metr, eni 2 metr, chuqurligi 4 metr bo‘lgan joyda kanalizatsiya quvurini qidirish va tortish ishlari bilan band bo‘lgan. Ehtiyotsizlik oqibatida yon tuproqlar ko‘chib, ularni bosib qolgan.
Namangan viloyat FVB “Daryo” tahririyatiga halok bo‘lgan ishchilarning ismi-sharifi va manzilini taqdim etdi. Ular Namangan tumanining “Navbahor” mahallasida yashagan Shuhrat Akbarov va Chortoq tumanining shu nomli xo‘jaligi hududida istiqomat qilgan Yodgor Karimovdir. Ulardan biri 54, ikkinchisi 50 yoshda bo‘lgan.
Hozirda mazkur holat yuzasidan surishtiruv ishlari olib borilmoqda.
Izoh (0)