“O‘zbekistonda o‘tgan yilga nisbatan go‘daklar va onalar o‘limi oshgan” — senat qo‘mitasi raisi

Senatning Sud-huquq masalalari va korrupsiyaga qarshi kurashish qo‘mitasi raisi Narimon Umarov O‘zbekistonda o‘tgan yilga nisbatan go‘daklar va onalar o‘limi oshganini ma’lum qilgan. Bu haqda Senat matbuot xizmati xabar berdi.

Qo‘mita raisining ma’lum qilishicha, O‘zbekistonda reproduktiv salomatlikni, onalik va bolalikni muhofaza qilishga oid qonun hujjatlari ijrosini ta’minlashdagi kamchiliklar oqibatida 2019-yilga nisbatan go‘daklar o‘limi 428 taga (2019-yilda 6432 ta, 2020-yilda esa 6860 ta), onalar o‘limi 10 taga (145—155) oshgan.

Shuningdek, jinoyatchilik va huquqbuzarliklarni barvaqt aniqlash, ularni keltirib chiqarayotgan sabab va omillarni bartaraf etish bo‘yicha kamchiliklarga barham berilmagan. Ta’kidlanishicha, respublika bo‘yicha ro‘yxatga olingan jami 62 081 ta jinoyatning 41 087 tasi yoki 66 foizi oldini olish mumkin bo‘lgan jinoyatlar toifasiga kiradi.

Umumiy jinoyatchilik 34,7 foizga ko‘paygan, og‘ir va o‘ta og‘ir jinoyatlar 49 foizga, jumladan, qasddan odam o‘ldirish — 13, badanga og‘ir shikast yetkazish — 13, nomusga tegish — 27,7, bosqinchilik 18,5 foizga ortgan.

Respublika bo‘yicha qidiruvda bo‘lgan 9790 nafar shaxsdan 6761 nafari yoki 75 foizi ushlanmagan.

Majlisda ushbu yo‘nalishda nazoratni yanada kuchaytirish, aniqlangan har bir qonun buzilishi holatiga nisbatan qat’iy va ta’sirchan choralar ko‘rish lozimligi qayd etilgan.