Senatning 24-aprel kuni o‘tkazilgan 14-yalpi majlisida Namangan shahri hududida yangi tuman tashkil etilishi masalasi ko‘rib chiqildi. Bu haqda Senat matbuot xizmati xabar qildi.
Namangan shahri 1926-yilda tashkil etilgan bo‘lib, bugungi kunda uning aholisi 640,1 ming nafarni, umumiy yer maydoni 18 ming gektarni tashkil qilmoqda.
Qayd etilishicha, 2019-yilda viloyatning Chortoq va Namangan tumanlaridan 57 ming nafar aholi istiqomat qiluvchi 6,3 ming gektar yer maydoni Namangan shahri tarkibiga qo‘shilishi natijasida ushbu hududda yashovchi aholining shahar markaziga qatnovida turli muammolar yuzaga kelgan.
Hudud aholisiga xizmat ko‘rsatuvchi tibbiyot muassasalari shahar markazidan 15—20 kilometr uzoqlikda joylashganligi, sanoat korxonalarining kamligi sababli fuqarolarni ish bilan ta’minlashda muammolar yuzaga kelayotganligi aholining e’tirozlariga sabab bo‘lgan.
Bundan tashqari, 7 ta mahalla ichimlik suvi bilan to‘liq ta’minlanmagan, ichki yo‘llar esa bugungi kunda ta’mirtalab holatda.
2020-yilda Namangan shahri tarkibida 4,9 ming gektar yer maydoni hamda 151 ming nafar aholini o‘z ichiga oluvchi Davlatobod tumani tashkil etildi.
Natijada Davlatobod tumanida bugungi kunda urbanizatsiya jarayoni jadallashib, yangi infratuzilma obyektlari barpo etilmoqda va aholiga xizmat ko‘rsatish tizimi yanada rivojlanishiga xizmat qilmoqda.
Shu sababli ham Namangan shahri hududining 8,2 ming gektar yer maydoni hamda 155,6 ming nafar aholisiga ega yana bir Yangi Namangan tumanini tashkil etish va bu orqali fuqarolarni qiynayotgan muammolarni bartaraf etish hamda aholiga qulaylik yaratish choralarini ko‘rish taklifi ilgari surilmoqda.
Muhokama qilinayotgan Senat qarori loyihasiga ko‘ra, yangidan tashkil etiladigan tuman hududiga 24 ta mahalla fuqarolari yig‘ini, 21 ta umumta’lim maktabi, 40 ta maktabgacha ta’lim muassasasi, 2 ta tibbiyot muassasasi va 12 ta kasalxona o‘tkazilmoqda.
Yangi Namangan tumanining sanoat va ishlab chiqarishdagi rolini oshirish maqsadida kelajakda 16 ta sanoat korxonasi va 4 ta kichik sanoat zonasi foydalanishga topshirish rejalashtirilgan.
Buning natijasida sanoat korxonalarida ishlab chiqariladigan mahsulot hajmlarining shahar sanoatidagi umumiy ulushi 1 trillion so‘mga yetkazilib, minglab yangi ish o‘rinlari yaratiladi.
Yangi Namangan tumanining tashkil qilinishi tumanda zamonaviy infratuzilma obyektlari barpo etilishi va aholiga xizmat ko‘rsatish tizimi yanada rivojlanishiga va eng asosiysi aholining turmush farovonligini oshirishda xizmat qilishi ta’kidlandi.
Mazkur masala yuzasidan Oliy Majlis Senatining tegishli qarori qabul qilindi.
Bundan avval Sergeli hokimi Toshkent shahridagi tumanlarni Toshkent viloyatidagi shahar va tumanlarga biriktirish siyosati haqida fikr bildirgani, Prezident Samarqanddagi tuman nomini o‘zgartirishni taklif qilgani hamda O‘zbekistondagi 13 ta tuman innovatsion hududga aylantirilishi haqida xabar berilgandi.
Izoh (0)