Oliy Majlis Senati 24-aprel kuni bo‘lib o‘tgan 14-yalpi majlisida Soliq kodeksiga o‘zgartish kiritish to‘g‘risidagi qonunni ma’qulladi. Hujjat ayrim turdagi oziq-ovqat mahsulotlarini qo‘shilgan qiymat solig‘idan ozod qilishni nazarda tutadi, deya xabar berdi “Gazeta.uz”.
Budjet va iqtisodiy islohotlar masalalari qo‘mitasi raisi Erkin Gadoyev O‘zbekistonda o‘simlik yog‘i iste’moli hajmi yiliga 460 ming tonnani tashkil etishi, uning yarmi import hisobiga qoplanishini ma’lum qildi.
U jahon bozorida o‘simlik yog‘i narxi yil davomida 86 foizga, yil boshidan buyon esa 21 foizga qimmatlashganini ta’kidladi.
Qonun bilan Soliq kodeksining 483-moddasiga (vaqtinchalik soliq imtiyozlari) o‘zgartish kiritilmoqda.
Jumladan, 2021-yil 1-maydan 31-dekabrga qadar bo‘lgan davrda:
- o‘simlik yog‘i, kungaboqar va zig‘ir urug‘i, shuningdek, soya danagi importi;
- o‘simlik yog‘ini ishlab chiqarish va (yoki) realizatsiya qilish bo‘yicha mablag‘lar aylanmasi QQSdan ozod qilinmoqda.
- kungaboqar va paxta urug‘iga — bojxona qiymatining 30 foizi, biroq 1 kilogramm uchun 0,2 dollardan kam bo‘lmagan miqdorda;
- kungaboqar yog‘iga — 20 foiz, biroq 1 kilogramm uchun 0,2 dollardan kam bo‘lmagan miqdorda;
- paxta yog‘iga — 50 foiz, biroq 1 kilogramm uchun 0,5 dollardan kam bo‘lmagan miqdorda eksport boji joriy etilmoqda.
Moliya vaziri o‘rinbosari Dilshod Sultonov o‘simlik yog‘i QQSdan ozod qilinishi natijasida budjetga 267 milliard so‘mlik tushum tushmasligini ma’lum qildi.
Uning so‘zlariga ko‘ra, soliq ma’murchiligini yaxshilash va qo‘shimcha manbalar qidirish hisobiga QQSdan soliqlar tushumi 200 milliard so‘mga oshiriladi.
2021-yil 1-yanvardan O‘zbekiston 73 nomdagi tovar importiga aksiz soliqlarini bekor qilgan edi. Bularga oziq-ovqat mahsulotlari (20 turdagi tovarlar — sharbatlar, pishloq, tvorog, margarin, unli qandolat mahsulotlari, kolbasa va shu kabi go‘sht mahsulotlari), elektrotexnika (35 turdagi mahsulotlar — muzlatgichlar, televizorlar, gaz plitalari, changyutgichlar, kir yuvish mashinalari) va boshqalar kiradi.
Moliya vaziri o‘rinbosarining ta’kidlashicha, ushbu ikki manba hisobiga o‘simlik yog‘i importiga QQS bekor qilinishi sababli budjetga tushmaydigan mablag‘lar o‘rni qoplanadi.
Qonun kuchga kirishi uchun u Prezident tomonidan imzolanishi lozim.
Bundan avval Markaziy bank o‘zbekistonliklarni ayrim asosiy oziq-ovqat narxlari keskin oshishidan ogohlantirgani, Toshkentda ayrim mahsulotlar Yevropa poytaxtlaridan ham qimmatroq ekani aniqlangani hamda Oziq-ovqat sanoati uyushmasi raisi O‘zbekistonda o‘simlik yog‘i narxlarining oshishiga izoh bergani haqida xabar berilgandi.
Izoh (0)