Samarqand shahrida 40 yashar erkak bilan gaplashib, undan 1500 dollar talab qilgan 16 yoshli qiz qo‘lga olindi, deya xabar qilmoqda Tergov departamenti.
Ma’lum qilinishicha, viloyat Ichki ishlar boshqarmasiga 40 yoshli U.T. ismli erkak ariza bilan murojaat qilgan. Unda tanishi 16 yoshli M.A. ismli qiz u bilan gaplashib yurganini oila a’zolariga bildirib, sharmanda qilishini aytib, 1500 AQSh dollar talab qilganini bayon etgan.
Olib borilgan tezkor tadbir davomida shu kuni soat 21:30 da M.A. 1500 AQSh dollarni tovlamachilik yo‘li bilan U.T.dan olayotgan vaqtida ushlangan. Shuningdek, M.A.dan maxsus kimyoviy ishlov berilgan mazkur pullar ashyoviy dalil tariqasida rasmiylashtirib olingan.
Holat yuzasidan Samarqand shahri bo‘yicha IIO FMB huzuridagi Tergov bo‘limi tomonidan voyaga yetmagan M.A.ga nisbatan Jinoyat kodeksining 165-moddasi 1-qismi (tovlamachilik) bilan jinoyat ishi qo‘zg‘atilib, gumon qilinuvchi tariqasida jalb qilingan. Hozirda tergov davom etmoqda.
Bundan avval Toshkent viloyatida tanishining suratlarini internetda tarqatish bilan qo‘rqitib, undan 5 mln so‘m talab qilgan nigeriyalik ushlangani, Samarqandda erkakning o‘zga ayol bilan yozishmalarini xotiniga ko‘rsatmaslik evaziga 14 mln so‘m talab qilgan ayol qo‘lga olingani hamda Farg‘onada fuqaro nomiga ariza yozib, uni qaytarib olish evaziga 2 ming dollar talab qilgan ikki ayol ushlangani haqida xabar berilgandi.
Izoh (0)