Jons Hopkins universiteti ma’lumotlariga ko‘ra, dunyoda koronavirus bilan kasallanganlar soni 144 771 350 kishiga yetdi. Ushbu ko‘rsatkich bo‘yicha odatdagidek AQSh (31,9 million), Hindiston (16,2 million), Braziliya (14,1 million), Fransiya (5,4 million) va Rossiya (4,6 million) yetakchilik qilmoqda. Global o‘limlar soni esa 3 072 614 tani tashkil qilmoqda.
Yaponiyada favqulodda holat rejimi kiritiladi
Yaponiya hukumati Tokioda va yana uchta prefekturada koronavirus tarqalishi tufayli favqulodda holat rejimini joriy qiladi. Karantin 25-apreldan 11-mayga qadar amal qiladi.“O‘tgan yil bahorda bo‘lgani kabi biz fuqarolardan uyda qolib, kuchli zarurat bo‘lmasa, ko‘chaga chiqmaslikni so‘raymiz”, — dedi iqtisodiyotni qayta tiklash vaziri Yasutosi Nisimura. Uning so‘zlariga ko‘ra, cheklovlar koronavirusning yangi mutatsiyalari tarqalishi bilan bog‘liqdir.
Hukumat yirik univermaglar va spirtli ichimliklar sotiladigan joylarning egalarini o‘z faoliyatini to‘xtatishga chaqirdi. Tomoshabinlar ishtirokidagi ommaviy tadbirlar bekor qilinadi. Dam olish kunlari jamoat transporti reyslari kamaytiriladi.
Favqulodda holat rejimi Yaponiyaning ba’zi hududlarida 7-yanvardan amal qilib kelayotgan edi. Tokioda karantin 22-martgacha davom etdi. Yaponiyada COVID-19’ga chalinganlar soni 550 mingdan oshdi, shularning 10 ming nafari vafot etgan.
Mavzuga doir: Pandemiya tufayli Tokiodagi Olimpiada o‘yinlariga chet ellik tomoshabinlar kiritilmaydigan bo‘ldi
Vengriyada restoranlar va teatrlar emlanganlar uchun ochiladi
Vengriyada kelasi hafta vaksinatsiya pasportiga ega bo‘lgan fuqarolar uchun restoran va kafelar, teatrlar, kino, mehmonxona va boshqa jamoat muassasalari ochiladi.24-apreldan esa mamlakatda kafe va restoranlarning yozgi ayvonlari cheklovlarsiz ish boshlaydi. Kelasi hafta vaksina olganlar uchun teatr, sirk, kinoteatr, trenajyor zallari, basseynlar, jamoat hammomlari, kutubxonalar va sport tadbirlaridagi tribunalar ochiladi.
Vengriya hukumati qayd etishicha, aholining emlanishi bunga imkoniyat yaratgan. Mamlakatda 9,7 million aholining 3,5 millioni allaqachon emlangan. Kelasi hafta COVID-19’ga qarshi emlanganlar soni 4 million kishidan oshishi kerak, bu aholining 40 foizi demakdir.
Hindistonda COVID-kasalxona yonib ketib, 13 kishi halok bo‘ldi
Hindistonning Maxarashtra shtatidagi xususiy kasalxonada yong‘in sodir bo‘ldi, kamida 13 kishi halok bo‘ldi. Koronavirus bo‘limida o‘t chiqqan.Yong‘in kechasi uchdan keyin to‘rt qavatli kasalxonaning ikkinchi qavatida joylashgan intensiv davolash bo‘limida boshlangan. Bu paytda bo‘limda 17 bemor bo‘lgan, to‘rt kishi qutqarilgan.
Yong‘inni o‘chirish uchun o‘t o‘chiruvchilarga qariyb ikki soat vaqt kerak bo‘lgan. Yong‘in sabablari o‘rganilmoqda.
Mavzuga doir: Hindistondagi COVID-19 kasalxonasida 24 nafar odam gazdan bo‘g‘ilib halok bo‘ldi (foto va video)
AQShda Johnson & Johnson vaksinasidan keyin yana bir o‘lim qayd etildi
AQSh hukumati Oregon shtatida Johnson & Johnson kompaniyasining koronavirusga qarshi vaksinasi bilan emlangan ayolning o‘limi holatini tekshirmoqda. 50 yoshli bemor vaksinadan keyin ikki hafta o‘tib vafot etgan, unda tromboz yuzaga kelgan.AQSh Kasalliklar nazorati va profilaktikasi markazlari 20-aprel kuni tekshiruv boshladi. Ikki kundan keyin tekshiruv haqida Oregon shtati hukumati xabar topdi.
Ayol Amerika regulyatori tromblar xavfi tufayli Johnson & Johnson vaksinasi bilan emlashni to‘xtatib qo‘yishidan avvalroq vaksina olgan.
Izoh (0)