Жонс Ҳопкинс университети маълумотларига кўра, дунёда коронавирус билан касалланганлар сони 144 771 350 кишига етди. Ушбу кўрсаткич бўйича одатдагидек АҚШ (31,9 миллион), Ҳиндистон (16,2 миллион), Бразилия (14,1 миллион), Франция (5,4 миллион) ва Россия (4,6 миллион) етакчилик қилмоқда. Глобал ўлимлар сони эса 3 072 614 тани ташкил қилмоқда.
Японияда фавқулодда ҳолат режими киритилади
Япония ҳукумати Токиода ва яна учта префектурада коронавирус тарқалиши туфайли фавқулодда ҳолат режимини жорий қилади. Карантин 25 апрелдан 11 майга қадар амал қилади.«Ўтган йил баҳорда бўлгани каби биз фуқаролардан уйда қолиб, кучли зарурат бўлмаса, кўчага чиқмасликни сўраймиз», — деди иқтисодиётни қайта тиклаш вазири Ясутоси Нисимура. Унинг сўзларига кўра, чекловлар коронавируснинг янги мутациялари тарқалиши билан боғлиқдир.
Ҳукумат йирик универмаглар ва спиртли ичимликлар сотиладиган жойларнинг эгаларини ўз фаолиятини тўхтатишга чақирди. Томошабинлар иштирокидаги оммавий тадбирлар бекор қилинади. Дам олиш кунлари жамоат транспорти рейслари камайтирилади.
Фавқулодда ҳолат режими Япониянинг баъзи ҳудудларида 7 январдан амал қилиб келаётган эди. Токиода карантин 22 мартгача давом этди. Японияда COVID-19’га чалинганлар сони 550 мингдан ошди, шуларнинг 10 минг нафари вафот этган.
Мавзуга доир: Пандемия туфайли Токиодаги Олимпиада ўйинларига чет эллик томошабинлар киритилмайдиган бўлди
Венгрияда ресторанлар ва театрлар эмланганлар учун очилади
Венгрияда келаси ҳафта вакцинация паспортига эга бўлган фуқаролар учун ресторан ва кафелар, театрлар, кино, меҳмонхона ва бошқа жамоат муассасалари очилади.24 апрелдан эса мамлакатда кафе ва ресторанларнинг ёзги айвонлари чекловларсиз иш бошлайди. Келаси ҳафта вакцина олганлар учун театр, цирк, кинотеатр, тренажёр заллари, бассейнлар, жамоат ҳаммомлари, кутубхоналар ва спорт тадбирларидаги трибуналар очилади.
Венгрия ҳукумати қайд этишича, аҳолининг эмланиши бунга имконият яратган. Мамлакатда 9,7 миллион аҳолининг 3,5 миллиони аллақачон эмланган. Келаси ҳафта COVID-19’га қарши эмланганлар сони 4 миллион кишидан ошиши керак, бу аҳолининг 40 фоизи демакдир.
Ҳиндистонда COVID-касалхона ёниб кетиб, 13 киши ҳалок бўлди
Ҳиндистоннинг Махараштра штатидаги хусусий касалхонада ёнғин содир бўлди, камида 13 киши ҳалок бўлди. Коронавирус бўлимида ўт чиққан.Ёнғин кечаси учдан кейин тўрт қаватли касалхонанинг иккинчи қаватида жойлашган интенсив даволаш бўлимида бошланган. Бу пайтда бўлимда 17 бемор бўлган, тўрт киши қутқарилган.
Ёнғинни ўчириш учун ўт ўчирувчиларга қарийб икки соат вақт керак бўлган. Ёнғин сабаблари ўрганилмоқда.
Мавзуга доир: Ҳиндистондаги COVID-19 касалхонасида 24 нафар одам газдан бўғилиб ҳалок бўлди (фото ва видео)
АҚШда Johnson & Johnson вакцинасидан кейин яна бир ўлим қайд этилди
АҚШ ҳукумати Орегон штатида Johnson & Johnson компаниясининг коронавирусга қарши вакцинаси билан эмланган аёлнинг ўлими ҳолатини текширмоқда. 50 ёшли бемор вакцинадан кейин икки ҳафта ўтиб вафот этган, унда тромбоз юзага келган.АҚШ Касалликлар назорати ва профилактикаси марказлари 20 апрель куни текширув бошлади. Икки кундан кейин текширув ҳақида Орегон штати ҳукумати хабар топди.
Аёл Америка регулятори тромблар хавфи туфайли Johnson & Johnson вакцинаси билан эмлашни тўхтатиб қўйишидан аввалроқ вакцина олган.
Изоҳ (0)