Bolalar ombdusmani Qashqadaryoda joylashgan 5-mehribonlik uyidagi sharoitlarni tanqid qilganidan so‘ng ushbu mehribonlik uyi direktori ishdan olinib, bir qator mas’ullar javobgarlikka tortilgandi. Kitob tuman hokimiyati matbuot xizmati 2020-yilning fevralidayoq xalq ta’limi vaziri Sherzod Shermatov mazkur muassasani yopish taklifi bilan chiqqanini ma’lum qildi.
Qayd etilishicha, 20-aprel kuni viloyat hokimligi, viloyat prokuraturasi, xalq ta’limi, moliya, IIB, SEO va JSX, bandlik bosh boshqarmalari mas’ullaridan iborat ishchi guruhi tuzilgan bo‘lib, ular tomonidan muassasada yaratilgan shart-sharoitlarni o‘rganish yuzasidan tekshiruv o‘tkazilmoqda.
O‘rganishlar davomida aniqlanishicha, xalq ta’limi vazirining 2020-yil 14-fevraldagi xatida mexribonlik uylarida ota-onasi bor kam ta’minlangan oila farzandlarini joylashtirish ortib ketganligi sababli ijtimoiy ahvoli yaxshilangan oila farzandlarini qaytarish orqali Kitob tumanidagi 5-sonli mehribonlik uyi faoliyatini tugatib, tarbiyalanuvchilarni Qamashi tumanidagi 4-sonli mehribonlik uyiga o‘tkazish va 4-sonli mehribonlik uyini Qamashi Bolalar shaharchasiga aylantirish taklifi bildirilgan.
“Biroq respublika hududida koronavirus infeksiyasiga qarshi kuchaytirilgan tartib joriy etilganligi bois 5-sonli mehribonlik uyining faoliyatini tugatish bilan bog‘liq ishlar oxiriga yetkazilmagan”, — deyiladi xabarda.
O‘rganishlar davomida, shuningdek, muassasada 65 nafar tarbiyalanuvchi bo‘lsa-da, 75 nafar xodim faoliyat ko‘rsatib kelayotgani, shundan 10 nafar tarbiyachi vazifasiga nomutaxassislar ishga qabul qilingani, tarbiyalanuvchilarning 15 nafari chin yetim hisoblanishi, 50 nafarining ota-onasi yoki ulardan biri hayot ekanligi aniqlangan.
Ayni paytda o‘rganish ishlari davom etayotgani ta’kidlangan. Viloyat prokuraturasi hozirda mehribonlik uyi tarbiyalanuvchilari uchun munosib shart-sharoitlar yaratishga ahamiyat berilayotganini ma’lum qilgan.
Izoh (0)