Samarqand shahridagi 31 ta maktabda koronavirusga chalinish holatlari aniqlandi, deya xabar bermoqda “Xalq so‘zi Online”.
Samarqand shahridagi 31 ta umumiy o‘rta ta’lim maktabining o‘qituvchi va o‘quvchilari orasida koronavirus infeksiyasini yuqtirish holatlari aniqlangani sababli ushbu maktablarda 14 kunga o‘quv jarayoni masofaviy shaklga o‘tkazilgan.
Shuningdek, 21-aprel kuni ham 1, 19, 41 va 47-maktab o‘quvchilari orasida kasallik yuqtirish holati aniqlandi va bu maktablarda ham o‘qish onlayn tartibda olib boriladigan bo‘ldi.
Ma’lumot uchun, ayni paytda shahardagi 35 ta maktabda ta’lim jarayoni masofaviy tarzda olib borilyapti. Ushbu maktablarning o‘qituvchi va o‘quvchilaridan olinadigan tibbiy test natijalariga qarab o‘qishlar an’anaviy shaklga o‘tkazilishi mumkin.
Bundan avval Toshkent davlat sharqshunoslik universiteti, Jismoniy tarbiya va sport universiteti va Jahon tillari universiteti hamda uning akademik litseyida ham o‘quv jarayonlari onlayn shaklga o‘tkazilgani haqida xabar berilgan edi. Jahon iqtisodiyoti va diplomatiya universitetida o‘quv jarayonlari 19-apreldan, Samarqand iqtisodiyot va servis institutida esa 20-apreldan 14 kunga masofaviy shaklga o‘tkazilgandi.
Shuningdek, Alisher Navoiy nomidagi Toshkent davlat o‘zbek tili va adabiyoti universitetida professor-o‘qituvchilari, talabalari orasida koronavirusga chalinish holati aniqlangani sabab darslar 19-apreldan onlayn shaklga o‘tkazilgani haqida xabar berildi. O‘zbekiston jurnalistika va ommaviy kommunikatsiyalar universitetida ham darslar 12-apreldan boshlab ikki haftaga onlayn shaklga o‘tkazildi.
Bundan tashqari, O‘zbekiston davlat konservatoriyasining 4 nafar o‘qituvchi va 1 nafar talabasida koronavirus aniqlanib, OTM masofaviy ta’limga o‘tgandi. 25-mart kuni Toshkent moliya instituti va Toshkent transport universiteti talabalarida ham koronavirus aniqlangani sabab fakultet talabalari masofaviy shaklga o‘tkazilgandi.
Izoh (0)