Rossiya prezidenti Vladimir Putin Ukraina rahbari Vladimir Zelenskiyning Donbassda uchrashish taklifi haqida xabardor qilindi. Bu haqda Kreml vakili Dmitriy Peskovga tayanib, “RBK” xabar berdi.
“Bilasizmi, video haqida unga zudlik bilan xabar qilingan, aniqrog‘i, videoning o‘zi emas, balki matni haqida, albatta. Ammo Putin hali bu bilan tanishib ulgurganiga amin emasman. Shunday bo‘lsa-da, yana bir bor takrorlayman, u odatiga ko‘ra, tadbirlar arafasida tunning aksariyat qismini tadbir matni bilan ishlab o‘tkazadi. O‘tgan tunda Federal majlisga tayyorlagan murojaati ustida ishlagan”, — dedi Peskov.
Peskovning ta’kidlashicha, chorshanba kuni prezident uchun boshqa tadbirlar ham rejalashtirilgan. “Agar Putin vaqt orttira olsa, albatta, Zelenskiyning taklifi bilan tanishib chiqadi. Bu haqda u yoki bu tarzda xabar beriladi”, — deya qo‘shimcha qildi Peskov.
Shu bilan birga, Peskov Putin bilan uchrashuv to‘g‘risida Zelenskiy tomonidan yaqin orada rasmiy so‘rovlar bo‘lmaganini ta’kidladi. Shuningdek, u prezidentlarning uchrashuvi uchun “ma’lum old shartlar” bo‘lishi kerakligini ham aytib o‘tdi.
20-aprel kuni Vladimir Zelenskiy o‘zining Telegram kanaliga joylashtirilgan videomurojaati orqali Putinni Donbassda uchrashishga taklif qildi. Shu bilan birga, u Ukraina urushni xohlamasligini, ammo bunga tayyorligini ta’kidladi.
Wall Street Journal (WSJ) gazetasi Rossiyaning Qrim va Voronej viloyatidagi harbiy texnikalarining sun’iy yo‘ldoshdan olingan suratlarini chop etdi. Nashrning ta’kidlashicha, sun’iy yo‘ldosh tasvirlari orqali Rossiya Ukraina bilan chegarada ilgari taxmin qilinganidan ko‘ra ko‘proq jangovar samolyotlarni joylashtirganini ko‘rish mumkin.
2021-yil mart oyining oxirida rasmiy Kiyev va tan olinmagan Donesk hamda Lugansk Xalq Respublikalari o‘rtasidagi ziddiyat avj oldi. Buning fonida Rossiya o‘zining Ukraina chegaralaridagi qo‘shinlari sonini ko‘paytira boshladi. Conflict Intelligence Team tergov guruhi Ukraina chegaralaridagi Rossiya qo‘shinlarining faol tarzda ko‘paytirilishi 2014–2015-yillardan buyon eng yuqori darajaga chiqqanini aytdi. Kiyev ma’lumotlariga ko‘ra, Moskva Ukraina chegarasiga va Qrimga 40 ming nafardan askarni joylashtirgan.
Bayden va Angela Merkel Rossiyani Ukraina bilan chegaradagi qo‘shinlarini olib ketishga chaqirdi. Ukraina prezidenti Vladimir Zelenskiy Rossiyani “jilovlash”da Baydendan yordam so‘radi. Kreml esa Rossiya va Ukraina o‘rtasidagi urush ehtimolini istisno qildi.
Izoh (0)