Россия президенти Владимир Путин Украина раҳбари Владимир Зеленскийнинг Донбассда учрашиш таклифи ҳақида хабардор қилинди. Бу ҳақда Кремль вакили Дмитрий Песковга таяниб, «РБК» хабар берди.
«Биласизми, видео ҳақида унга зудлик билан хабар қилинган, аниқроғи, видеонинг ўзи эмас, балки матни ҳақида, албатта. Аммо Путин ҳали бу билан танишиб улгурганига амин эмасман. Шундай бўлса-да, яна бир бор такрорлайман, у одатига кўра, тадбирлар арафасида туннинг аксарият қисмини тадбир матни билан ишлаб ўтказади. Ўтган тунда Федерал мажлисга тайёрлаган мурожаати устида ишлаган», — деди Песков.
Песковнинг таъкидлашича, чоршанба куни президент учун бошқа тадбирлар ҳам режалаштирилган. «Агар Путин вақт орттира олса, албатта, Зеленскийнинг таклифи билан танишиб чиқади. Бу ҳақда у ёки бу тарзда хабар берилади», — дея қўшимча қилди Песков.
Шу билан бирга, Песков Путин билан учрашув тўғрисида Зеленский томонидан яқин орада расмий сўровлар бўлмаганини таъкидлади. Шунингдек, у президентларнинг учрашуви учун «маълум олд шартлар» бўлиши кераклигини ҳам айтиб ўтди.
20 апрель куни Владимир Зеленский ўзининг Telegram каналига жойлаштирилган видеомурожаати орқали Путинни Донбассда учрашишга таклиф қилди. Шу билан бирга, у Украина урушни хоҳламаслигини, аммо бунга тайёрлигини таъкидлади.
Wall Street Journal (WSJ) газетаси Россиянинг Қрим ва Воронеж вилоятидаги ҳарбий техникаларининг сунъий йўлдошдан олинган суратларини чоп этди. Нашрнинг таъкидлашича, сунъий йўлдош тасвирлари орқали Россия Украина билан чегарада илгари тахмин қилинганидан кўра кўпроқ жанговар самолётларни жойлаштирганини кўриш мумкин.
2021 йил март ойининг охирида расмий Киев ва тан олинмаган Донецк ҳамда Луганск Халқ Республикалари ўртасидаги зиддият авж олди. Бунинг фонида Россия ўзининг Украина чегараларидаги қўшинлари сонини кўпайтира бошлади. Conflict Intelligence Team тергов гуруҳи Украина чегараларидаги Россия қўшинларининг фаол тарзда кўпайтирилиши 2014–2015 йиллардан буён энг юқори даражага чиққанини айтди. Киев маълумотларига кўра, Москва Украина чегарасига ва Қримга 40 минг нафардан аскарни жойлаштирган.
Байден ва Ангела Меркель Россияни Украина билан чегарадаги қўшинларини олиб кетишга чақирди. Украина президенти Владимир Зеленский Россияни «жиловлаш»да Байдендан ёрдам сўради. Кремль эса Россия ва Украина ўртасидаги уруш эҳтимолини истисно қилди.
Изоҳ (0)