Indoneziyaning Bali orolida bortida 53 nafar dengizchi bo‘lgan suvosti kemasi bedarak yo‘qoldi. Bu haqda mamlakat Qurolli kuchlari qo‘mondoni Xadi Chaxyantoga tayanib, Reuters xabar berdi.
Indoneziyaning harbiy dengiz kuchlariga tegishli bo‘lgan, Germaniyada ishlab chiqarilgan KRI Nanggla-402 suvosti kemasi torpedalar bilan mashg‘ulot o‘tkazgan, lekin natijalar haqida xabar bermagan. Taxminlarga ko‘ra, Balidan 96 kilometr shimolda aloqa uzilib qolgan.
Indoneziya hukumati Singapur va Avstraliyadan qidiruv ishlarida yordam so‘radi.
Avvalroq Bangladeshning Shitalakshya daryosida 50 nafar yo‘lovchini olib ketayotgan parom (solsimon yassi kema) yuk tashuvchi kema bilan to‘qnashib, cho‘kib ketishi natijasida besh kishi halok bo‘lgani haqida xabar berilgandi.
O‘rta Yer dengizining Tunis qirg‘oqlari yaqinida esa ichida noqonuniy ko‘chayotgan muhojirlar bo‘lgan ikkita qayiq ag‘darilib, cho‘kib ketdi. Qayiqlar Italiyaning Lampeduza oroli tomon ketayotgan edi. Halokat oqibatida kamida 39 kishi halok bo‘lgan.
Shuningdek, Rossiya Federatsiyasi bayrog‘i ostidagi “Arvin” quruq yuk tashuvchi kemasi Qora dengizda Turkiyaning Bartin viloyati sohillari yaqinida cho‘kib ketgani haqida ma’lumot berildi. Bortda jami 13 nafar ekipaj a’zosi bo‘lgani, ularning barchasi rossiyalik ekani ma’lum bo‘ldi. Ularning besh nafari qutqarilgan. Kamida ikki kishi halok bo‘lgan.Keyinroq qutqarib olingan Rossiya fuqarosi Nikolay Krinov fojia yomon ob-havo sharoiti tufayli yuz bergan bo‘lishi mumkinligini aytdi.
Izoh (0)