AQShning Ogayo shtati Kolumbus shahrida politsiya xodimi 16 yoshli qora tanli qizni otib o‘ldirdi. Bunga javoban politsiya binosi oldida namoyishchilar to‘planishni boshladi, deb yozadi “RBK”.
Mahalliy 10TV telekanalining xabar berishicha, 20-aprel kuni tartib buzilgani to‘g‘risidagi xabar bilan hodisa joyiga politsiya chaqirilgan. Marhum Makaya Brayantning oilasi uyi oldida qizlar mushtlashib ketgani sababli politsiyani yordamga chaqirgan. Marhumning xolasi jiyanining qo‘lida pichoq bo‘lganini aytdi. Ammo u pichoqni janjal paytida o‘zini himoya qilish uchun qo‘liga olgandi, deydi ayol.
Politsiya o‘qidan og‘ir jarohat olgan Brayant kasalxonada vafot etdi. U qay tarzda otib tashlangani haqida aniq ma’lumot berilmagan. Kolumb meri Endryu Jinter Twitter’da “yosh qiz fojiali tarzda halok bo‘ldi” deb yozdi, ammo tafsilotlarni keltirmadi. Uning aytishicha, hodisa politsiyachining bodi-kamerasiga yozib olingan.
“Men aholidan tinchlik saqlashni va Tergov byurosiga faktlarni yig‘ishiga ruxsat berishni iltimos qilaman”, — deb yozdi shahar meri Twitter’da. Biroq 10TV telekanali xabariga ko‘ra, allaqachon namoyishchilar politsiya bo‘limi oldida to‘planib, marhum qizning ismini aytib baqirishni boshlagan.
https://twitter.com/Qwolnosci/status/1384657867081461761
Qayd etilishicha, ushbu hodisa taxminan qora tanli amerikalik Jorj Floydni bo‘g‘ib o‘ldirgan sobiq politsiyachiga hukm e’lon qilingan vaqtda sodir bo‘lgan. Sud hay’ati Minneapolis shahrining sobiq politsiyachisi Derek Shovinni afroamerikalik Jorj Floydni ehtiyotsizlik orqasida odam o‘ldirishda aybdor deb topdi. Suddan keyin Shovin Minnesota shtatidagi Ouk-Park-Xayts axloq tuzatish muassasasiga joylashtirildi.
Ma’lumot uchun, AQShning Minnesota shtatidagi Bruklin-Senter shahrida yana bir qora tanli yigit politsiyachilar tomonidan hibsga olinish paytida o‘ldirildi. Shundan so‘ng shaharda norozilik namoyishlari boshlangan. Shuningdek, AQShda politsiyachi shifoxonaga yotqizilgan qora tanli erkakni otib qo‘ygan edi.
Izoh (0)