Chexiya hukumati tomonidan Rossiya bosh razvedka boshqarmasi ayblanayotgan 2014-yil Vrbetitse qishlog‘idagi o‘q-dorilar omborlarida sodir bo‘lgan portlashlar operatsiyasiga razvedka boshqarmasining 29155-sonli harbiy qism boshlig‘i, general Andrey Averyanov shaxsan rahbarlik qilgan. Bu haqda The Insider va Bellingcat agentliklari tomonidan o‘tkazilgan surishtiruvda aytilgan.
Surishtiruv ma’lumotlariga ko‘ra, operatsiyada jami olti kishi qatnashgan — Averyanovning ikki yordamchisi Denis Sergeyev va Yegor Gordiyenko, podpolkovnik Nikolay Yejov shuningdek, maxsus xizmat zobitlari deb taxmin qilingan Aleksandr Petrov va Ruslan Boshirov nomi bilan ataluvchi shaxslar. Chexiyada ular Ruslan Tabarov va Nikolay Popa ismli pasportlardan foydalangan.
Ta’kidlanishicha, Petrov va Boshirov omborda qurol saqlash bilan shug‘ullanadigan Imex kompaniyasi bilan bog‘lanib, 2014-yil 13—17 oktabr kunlari omborning yopiq qismiga kirishni so‘ragan. Ular o‘zlarini o‘q-dorilarning potensial xaridorlari sifatida tanishtirgan. Imex bolgariyalik qurol sotuvchisi Emelyan Gebrev bilan bog‘lanib, unga potensial mijozlar to‘g‘risida xabar bergan, ammo Gebrev uchrashuvga qiziqish bildirmagan. Omborda 16-oktabr kuni portlash sodir bo‘lgan. Hodisadan bir necha daqiqa o‘tib Petrov va Boshirov Venadan Moskvaga, Averyanov va Yejov esa o‘sha kuni Pragadan Venaga uchib ketgan, u yerdan ular ham Moskvaga borgan.
17-aprel kuni Chexiya maxsus xizmatlarning Petrov va Boshirov ismli zobitlari qidiruvga berildi. Shu bilan birga, Chexiya rasmiylari razvedka xizmatida ishlaganlikda gumon qilinayotgan Rossiya elchixonasining 18 nafar xodimi mamlakatdan chiqarib yuborilishi haqida e’lon qilindi. Chexiya bosh vaziri Andrey Babish 19-aprel kuni portlashlar “davlat terrorizmi akti” emasligini aytdi, chunki ular Chexiyaga emas, balki “bolgar qurol sotuvchisining mollariga” qaratilgan.
Rossiya ayblovlarni bema’ni va asossiz deb atadi va Chexiyaning xatti-harakatlariga javob sifatida 20 nafar chexiyalik diplomatni mamlakatdan chiqarib yubordi.
Izoh (0)