Armaniston bosh vaziri Nikol Pashinyanning mamlakat janubidagi Agardak shahriga ishchi safari chog‘ida bir necha yuzlab mahalliy aholi uning tashrifiga qarshi norozilik namoyishi o‘tkazdi. Namoyish mahalliy yangiliklar portallari tomonidan real vaqtda namoyish etildi, deb yozadi “TASS”.
Armanistonning eng janubiy shahridagi norozilik namoyishlari Pashinyanning tashrifidan keyin boshlandi. Shahar aholisi markazga yig‘ilib, Pashinyandan o‘tgan kuzda Tog‘li Qorabog‘dagi mojaro zonasida jangovar harakatlar paytida halok bo‘lganlar dafn etilgan mahalliy qabristonga tashrif buyurmaslikni talab qildi. Odamlar yo‘lni to‘sib qo‘ydi. Politsiyaning aralashuviga qaramay, bosh vazir to‘siqdan o‘tolmadi. Namoyishchilar hukumatga qarshi shiorlar aytib, Pashinyanni “Ozarbayjonga taslim bo‘lganlikda” aybladi. Shundan so‘ng Pashinyan shaharni tark etdi.
“Ularning bunday xulq-atvori uchun uzr so‘rayman”, — dedi Pashinyan megafonda. Bir necha o‘n metr yurib, mashinaga o‘tirdi va jo‘nab ketdi, deyiladi xabarda.
Agarakdan keyin Pashinyan Eron bilan chegara yaqinida joylashgan Megri shahriga keldi, u yerda ham bir necha yuzlab mahalliy aholi uni norozilik aksiyalari bilan kutib oldi va hududni tark etishni talab qildi.
“Sputnik Armeniya” xabariga ko‘ra, Megrida bosh vazirning tarafdorlari va muxoliflari o‘rtasida janjal kelib chiqqan.
Xabarga ko‘ra, norozilar bilan bir qatorda ayrim kishilar Pashinyanni qo‘llab-quvvatlash uchun yig‘ilgan. Ularning o‘rtasida janjal kelib chiqqan, ammo xavfsizlik kuchlari ularni ajratishga muvaffaq bo‘lgan. Janjal paytida Davlat xavfsizlik xizmati rahbari Sarkis Ovannisyanning kurtkasini yirtib tashlashgan. Ta’kidlanishicha, bosh vazirning Megriga tashrifi haqida oldindan e’lon qilinmagan edi.
Namoyishchilar hukumat boshlig‘ini “kapitulyatsiyaga imzo chekkan” va Armaniston yerlarini taslim etganlikda ayblab, shiorlar aytdi.
Mahalliy yangiliklar portallarida real vaqtda ko‘rsatilishicha, hukumat rahbari qo‘riqchilar qurshovida mashinaga o‘tirib, hududdan chiqib ketgan. “Megri aholisi bizning yerimizni topshirgan odam bizning shahar atrofida bemalol yura olmasligini namoyish qildi”, — dedi namoyishchilardan biri.
Keyin esa Pashinyan Kapan shahriga yetib keldi, u yerda ham bir guruh aholi uni norozilik harakati bilan kutib oldi. Hukumat rahbari kuchaytirilgan xavfsizlik yordamida mahalliy ma’muriyat binosiga kirgan.
“Nikol, sen bizning yerlarimizni berib yubording!” deb baqirgan namoyishchilar. Ayni paytda vazirlik rahbarining politsiya va xavfsizlik xodimlari ma’muriyat binosi joylashgan hududni o‘rab olgan.
Armanistonda Pashinyan va uning hukumatiga qarshi noroziliklar o‘tgan yilning 9-noyabridan so‘ng boshlandi. O‘shanda bosh vazir Rossiya prezidenti Vladimir Putin va Ozarbayjon prezidenti Ilhom Aliyev bilan birgalikda Tog‘li Qorabog‘ atrofidagi mojaro zonasida harbiy harakatlarnito‘xtash to‘g‘risida uch tomonlama bayonot imzolagan va mintaqada 27-sentabrda boshlangan jangovar harakatlarga nuqta qo‘yilgan edi. Muxolifat bosh vazirni ushbu voqealar natijasi uchun javobgar qildi.
Ichki siyosiy inqirozni hal qilish uchun Pashinyan mamlakatda 20-iyun kuni muddatidan oldin parlament saylovlari o‘tkazilishiga va saylovlar o‘tkazilishi uchun aprelda iste’foga chiqishga va’da berdi. Avvalroq Armanistonda sentabrdan buyon amal qilib kelgan harbiy holat bekor qilingani haqida xabar berilgandi.
Izoh (0)