Qora dengizda 27-fevral kuni NATO mamlakatlarining Ruminiya qo‘mondonligi ostidagi Poseidon 21 o‘quv mashg‘ulotlari boshlandi, deb yozadi “Kommersant”.
Foto: US Marine Corps
Dengizda, quruqlikda va havoda bo‘lib o‘tadigan manyovrlarda jami yettita mamlakat: Ruminiya, Bolgariya, Fransiya, Gretsiya, Ispaniya, AQSh va Turkiya qatnashishi kerak edi. Ammo Bolgariya mashg‘ulotlarda ishtirok etmasligi haqida alyansni va Ruminiy Bosh shtabini xabardor qilgan. Bunga respublika Harbiy-dengiz kuchlarining ikkita kemasida koronavirusga chalinish holatlari aniqlangani sabab bo‘lgan.
6-martga qadar davom etadigan o‘quv mashg‘ulotlarida harbiylar dushman tomonning aviatsiyasi, suvusti va suvosti kemalariga hamda suvosti tahdidlariga qarshi kurashish, xususan, dengiz minalarini va qo‘lbola portlovchi qurilmalarni zararsizlantirishni mashq qiladi.
“Poseidon 21 — yuqori darajada murakkab bo‘lgan o‘quv mashqlari. Ularning maqsadi NATOning tezkor javob qaytarish qobiliyatini kuchaytirish uchun alyans imkoniyatlaridan optimal foydalanish hisoblanadi”, — deyiladi Ruminiya Harbiy-dengiz kuchlari Bosh shtabi bayonotida.
O‘quv mashqlarida 700 dan ortiq harbiy xizmatchi, 13 ta kema va 9 ta samolyot qatnashadi.
Avvalroq NATO Iroqdagi qo‘shinlari sonini 500 kishidan 4000 kishiga yetkazishni rejalashtirayotgani haqida tashkilot bosh kotibi Yens Stoltenberg ma’lum qilgan edi.
