AQShning Arizona shtatida muhojirlar bilan bog‘liq inqiroz tufayli favqulodda holat e’lon qilindi

Meksika bilan chegaradagi inqiroz sharoitida AQSh shtati Arizonaning olti okrugida favqulodda holat e’lon qilindi. Tartibni saqlash uchun okruglarga Milliy gvardiya askarlari yuborildi. Bu haqda “Kommersant” xabar berdi.

“Federal hukumat harakat qilmaydigan bo‘lsa, Arizona harakat qiladi. Chegaradagi inqirozni hal qilish uchun men favqulodda holat e’lon qildim hamda Arizona milliy gvardiyasidan jasur erkaklar va ayollarni huquq tartibot organlarining sa’y-harakatlarini qo‘llab-quvvatlash va Arizona aholisini himoya qilish uchun jo‘natmoqdaman”,  — deb yozdi gubernator Dag Dyusi Twitter’da.

Ta’kidlanishicha, shtat hokimiyati chegarachilar tomonidan ushlab qolinayotgan muhojirlar sonining keskin ko‘payishi sababli shunday qarorga kelgan.

“AQSh chegara xizmati holdan toydi. Mahalliy huquqni muhofaza qilish idoralari va shahar merlari yordamga chaqirmoqda”, — deya qo‘shimcha qildi gubernator. Favqulodda holat chegaradagi Kochis, Pima, Sant-Krus, Yuma, Marikopa va Pinal okruglarida joriy etildi.

Arizona chegara okruglariga Milliy gvardiyaning 250 nafar jangchisini joylashtirish uchun taxminan 25 million dollar ajratadi. Gubernator prezident Jo Bayden ma’muriyatini mintaqadagi federal favqulodda rejimni bekor qilish bilan muhojirlar sonining keskin o‘sishiga yo‘l qo‘yib berganlikda aybladi.

AQSh Bojxona va chegaralarni muhofaza qilish byurosining ma’lumotlariga ko‘ra, mart oyida mamlakat janubiy chegarasida taxminan 172 ming noqonuniy muhojir ushlab qolingan, bu so‘nggi 15 yil ichidagi eng yuqori ko‘rsatkich. Agentlik chegarani kesib o‘tishga uringan qarovsiz bolalar soni ko‘payganini ta’kidlamoqda. Bu Baydenning bolalar faqat kattalar hamrohligida zudlik bilan Meksikaga qaytarilishi mumkin degan siyosati fonida kelib chiqmoqda.

Tramp ham Baydenni AQSh chegarasidagi muammolar uchun ayblamoqda. Trampning fikriga ko‘ra, Jo Bayden ma’muriyati zudlik bilan Meksika chegarasidagi devorning qurilishini qayta boshlashi kerak. Uning aytishicha, yangi ma’muriyatning xatti-harakatlari odamlarning o‘limi va fojiali voqealarga, shuningdek, janubiy chegara orqali AQShga giyohvand moddalar olib kirilishiga sabab bo‘ldi. Shuning uchun rasmiylar zudlik bilan devor qurilishini yakunlashi kerak. Tramp buni bir necha hafta ichida amalga oshirish mumkinligini ta’kidladi.