Қарши давлат университетининг Физика-математика факультетида тўлов-контракт асосида иккинчи курсда таҳсил олаётган талаба ўзини осиб қўйгани тўғрисида хабар берилганди. Университет мазкур воқеага муносабат билдириб, талабага ҳеч ким тазйиқ ўтказмаганини маълум қилди.
Маълум қилинишича, марҳум Р.Ф. Физика-математика факультетининг Информатика ўқитиш методикаси йўналиши 2-курсида ўқиган. 2021 йил 26 январь куни ушбу мудҳиш воқеа ўз тоғасининг уйида содир бўлган.
«2021 йил 29 январь куни эрталаб университет психологи А.Ҳусанов, Информатика ўқитиш методикаси кафедраси мудири И.Йўлдошев, гуруҳ раҳбари Л.Сафаров, Муборак туман ‘Геолог’ МФЙ раиси Н.Аширов ҳамроҳлигида марҳумнинг хонадонига таъзия билдиргани борилган. Р.Ф.нинг отаси гуруҳ мураббийи Л.Сафаров билан батафсил суҳбатлашган, оиласининг университет раҳбарияти ва ўқитувчилари жамоасига ҳеч қандай эътирози йўқлигини, ўғлининг ўлимидан қаттиқ қайғуда эканини билдирган», — дейилади муносабатда.
Қарши давлат университети ушбу ҳодисани батафсил ўрганиб, ҳеч кимга тазйиқ ўтказилмагани ва ҳеч қачон бости-бости қилинмаганини билдирди.
«Шунингдек, ўз фарзанди доғида қаттиқ изтиробда бўлган оила шаънини ўйламай хабарни оммалаштиришга уринаётган ҳурматли ‘Ижтимоий тармоқ ижодкорлари’га эса туҳмат ва ёлғон хабар тарқатганлик учун Маъмурий жавобгарлик тўғрисидаги ҳамда Жиноят кодексларида жавобгарлик белгиланганини эслатади», — дея қайд этилади хабарда.
Аввалроқ мазкур ҳолат юзасидан Қарши тумани прокуратураси томонидан қўшимча терговга қадар текширув ҳаракатлари ўтказилаётгани маълум қилинганди.
Мавзуга доир: Хоразмда 19 ёшли келин ўзини осиб ўлдирди
Изоҳ (0)