The Henley Pasport Index pasport reytingida O‘zbekiston bir pog‘onaga ko‘tarilib, 85-o‘rinni egalladi, deb xabar bermoqda Spot. O‘zbekiston 2021-yilning yanvar oyida e’lon qilingan reytingida 86-o‘rindan joy olgandi. 2020-yilning iyul oyidagi reytingda 86-o‘rinda, yanvar oyidagi reytingda esa 85-o‘rinda bo‘lgan.
Unga ko‘ra, O‘zbekiston fuqarolari 57 ta davlat hududiga vizasiz yoki yetib borgach, viza olish orqali sayohat qilishi mumkin.
Reytingda birinchi o‘rinni Yaponiya egalladi. Yaponiyaliklar 193 ta mamlakatga vizasiz tashrif buyurishi mumkin. Ikkinchi pog‘onadan Singapur (192 davlat), uchinchi pog‘onadan esa Germaniya (191 davlat) joy oldi.
MDH davlatlari orasida ham yaxshilanish kuzatilgan. Rossiya 48-o‘rinda (118 davlat), Belarus 68-o‘rinda (77 davlat), Qozog‘iston 69-o‘rinda (75 davlat), Tojikiston 84-o‘rinda (58) va Turkmaniston 89-o‘rinda (53 davlat).
Eng so‘nggi o‘rinlarni Suriya (29 davlat), Iroq (28 davlat) va Afg'oniston (26 davlat) egallagan.
Ma’lumot uchun, Henley reytingi harakat erkinligi indekslari asosida tuziladi. Bu ko‘rsatkich har bir davlat fuqarolarining qancha davlatga vizasiz yoki viza olish soddalashtirilgan tartibda borishi mumkinligini ifodalaydi.
Izoh (0)