Shavkat Mirziyoyev 15-aprel kuni Samarqand shahriga kelgani haqida xabar berilgan edi. Davlat rahbari shaharning Qorasuv mavzesida qurilgan ko‘p qavatli uylarni borib ko‘rdi.
Prezident matbuot xizmatining ma’lum qilishicha, Shavkat Mirziyoyev 2019-yilda viloyatga tashrifi chog‘ida bu yerdagi dastlabki uylarni ko‘zdan kechirib, yangi loyihalar taqdimoti bilan tanishgan edi. O‘tgan davrda bu loyihalar amalga oshirildi. Agromir Buildings mas’uliyati cheklangan jamiyati tomonidan mavzeda 16, 15, 14 va 12 qavatli jami 47 ta turar joy qurildi. Ularda 3 ming 588 ta xonadon bor.
Turar joylarning fasadi 3 qavatli qoplamadan iborat bo‘lib, xonadonlar qishda issiq, yozda salqin bo‘lishini ta’minlaydi. Binolarga videokuzatuv tizimi, yuqori texnologiyali yong‘in xavfsizligi uskunalari o‘rnatilgan. Har bir xonadon alohida isitish qozoni bilan jihozlangan. Uylar egalariga tayyor holda topshirilmoqda.
Qorasuv mavzesida qurilgan ko‘p qavatli uylar soni 116 taga yetdi. Shuningdek, bu yerda 1 ming 600 o‘rinli maktab, 120 o‘rinli bolalar bog‘chasi, mahalla fuqarolar yig‘ini binosi, savdo do‘konlari, o‘yin va sport maydonchalari barpo etilgan. 2021-yilda yana 7 ta 16 qavatli, 2 ta 25 qavatli uylar qurilmoqda.
Davlat rahbari uy-joylar va infratuzilma tarmoqlarining sifatiga alohida e’tibor qaratgan. Quruvchi tashkilotning sifat uchun mas’uliyati va javobgarligini yanada kuchaytiradigan mexanizm ishlab chiqish zarurligini ta’kidlagan.
“Rivojlangan davlatlardagidek uylar qurishni o‘zlashtirdik, endi xizmat ko‘rsatishni ham shunga yarasha yaxshilash kerak”, — degan Shavkat Mirziyoyev.
Prezident chet el tajribasi asosida servis turlarini kengaytirish, ko‘p qavatli uylarga xizmat ko‘rsatuvchi korxona hamda yong‘in xavfsizligini ta’minlash bo‘yicha maxsus punkt tashkil etish yuzasidan tavsiyalar bergan.
Shu yerda Samarqand shahri bosh rejasi va shahar hududini kengaytirish loyihalari taqdimoti o‘tkazilgan.
Bunda avval Shavkat Mirziyoyev Samarqand xalqaro aeroportidagi qurilish ishlarini, Imom Buxoriy yodgorlik majmuasini kengaytirish bo‘yicha amalga oshirilayotgan ishlarni ko‘zdan kechirgani haqida xabar berilgan edi.
Izoh (0)