Davlat soliq qo‘mitasi raisi Sherzod Kudbiyev ijtimoiy tarmoqlarda Toshkent viloyatining Olmaliq shahrida soliq xizmati xodimlari sotuvchilik orqali kun ko‘rayotgan ayollarning buyumlarini tortib olgani tasvirlangan videoga munosabat bildirdi.
Videoda uch nafar soliq xizmati xodimlari yo‘l bo‘yida turli narsalarni sotib o‘tirgan ayollarning mahsulotlarini tortib olib, mashinaga ortayotgani tasvirlangan.
“Ushbu videomurojaatni zudlik bilan yozishimga kuni kecha ijtimoiy tarmoqlarda Olmaliq shahrida sodir bo‘lgan noxush hodisa sabab bo‘ldi. Bu biz uchun juda uyatli, bizning sha’nimizga, umuman soliq xizmatining vazifalariga to‘g‘ri kelmaydigan hodisa yuz bergan.
Davlat soliq qo‘mitasi rahbari hozirda Samarqand viloyatida xizmat safarida ekanligini, bunga chora ko‘rilishini va’da qilgan.
“Qaytib borishim bilan Olmaliqda o‘sha hodisa yuz bergan joyda o‘zim bo‘laman. Lekin ungacha kutmasdan, bu hodisada o‘zini noo‘rin tutgan, noo‘rin xizmat vazifasini bajargan xodimlarga nisbatan tegishli jazo choralari ko‘riladi.
O‘ylaymanki, bu hech ham bizga yarashmaydi va soliq organlari kuchishlatar emas, balki tadbirkorlarimizga ko‘makchi bo‘ladigan idora. Ammo bunday ayanchli holatlar yuz beryapti va biz buni ildizi bilan yulib tashlashimiz kerak bo‘ladi. Ko‘rilgan choralar bo‘yicha qo‘shimcha ma’lumot beriladi”, — deydi DSQ rahbari
Sherzod Kudbiyev bunday holat yuz bergani uchun butun xalqdan uzr so‘rab, bu masala oxiriga yetkazilishini ta’kidlagan.
Izoh (0)