Prezident Shavkat Mirziyoyev Samarqand viloyatiga tashrifi davomida Imom Buxoriy yodgorlik majmuasida bo‘lib, bu yerda qurlishi boshlangan ziyoratgohning loyihalari taqdimoti bilan tanishdi, deb xabar beradi Prezident matbuot xizmati.
Davlat rahbari 2019-yili Samarqand viloyatiga tashrifi chog‘ida Imom Buxoriy yodgorlik majmuasini kengaytirish zarurligini ta’kidlagan edi.
“Bu joy Imom Buxoriy bobomizning ilmiga, islom olamidagi maqomiga munosib bo‘lishi kerak. Mamlakatimizda ziyorat turizmining asosi aslida shu yer. Bu maskanga qancha ziyoratchilar kelsayam, qulay sharoit bo‘lishi zarur”, — degan edi Shavkat Mirziyoyev o‘shanda.
Shunga muvofiq, majmuaning yangi loyihasi ishlab chiqildi. Prezident huzurida bir necha bor taqdimot qilinib, takomillashtirilgan. Jahon tajribasi ham o‘rganilgan.
Ta’kidlanishicha, 2021-yil muborak Ramazon kunlarida ushbu ziyoratgohning qurilishi boshlangan. Shu munosabat bilan bu yerda nuroniylar va ziyolilar bilan uchrashuv bo‘lib o‘tdi. Ish o‘rinlarini ko‘paytirib, aholi farovonligini oshirish, turmush sharoitlarini yaxshilash chora-tadbirlari to‘g‘risida so‘z yuritildi.
“To‘rt yillik izlanish, yangilanish va sinovlardan o‘tib, katta tajriba orttirdik. Xalqimizni hayotdan rozi qilishga qaratilgan ishlarimiz bundan keyin ham izchil davom ettiriladi. Ramazon oyining oliyjanob g‘oyalari, muqaddas amallari ham ana shunday ezgu maqsadlarimizni ro‘yobga chiqarishda mustahkam zamin bo‘ladi”, – deydi Prezident.
Uchrashuvda Qur’on oyatlaridan o‘qilib, duo qilingan. Davlat rahbari majmuada amalga oshirilayotgan ishlarni ko‘zdan kechirgan.
Bu yerda katta masjid, to‘rtta simmetrik minora, baland ayvonlar, yo‘ldan kirib kelishda xiyobon bo‘ladi. Ko‘p sonli ziyoratchilarga zamonaviy qulayliklar yaratish uchun 7 ta mehmonxona, 3 ta avtotururgoh va avtobekat, supermarket, bozorcha barpo etiladi. Shuningdek, oshxonalar, hunarmandchilik buyumlari rastasi, hammom, tahoratxona, kushxona qurilishi belgilangan.
Eslatib o‘tamiz, Prezident tashabbusi bilan 2019-yilda bu yerda Imom Buxoriy xalqaro ilmiy-tadqiqot markazi hamda Hadis ilmi maktabi ham tashkil etilgan edi. Qurilajak yangi majmua ular bilan mutanosiblikda ulkan maskan hosil qiladi. Endi bu yerda ziyoratchilar uchun hamma sharoitlar bo‘ladi.
Izoh (0)