2021-yilning birinchi choragida 12-ming nafar “yoshlar daftari”ga kirganlarga 255 milliard so‘m kredit ajratildi. Bu haqda Prezident Shavkat Mirziyoyev raisligida o‘tkazilgan yig‘ilishda ma’lum qilindi, deya xabar bermoqda “Daryo” muxbiri.
“Bir narsani tushuninglar, yoshlar muammolarini faqatgina Yoshlar agentligi yoki Yoshlar ittifoqining o‘zi hal qiladi, deb o‘ylasak, xato bo‘ladi. Hali oldimizda bu borada o‘z yechimini kutayotgan ko‘plab vazifalar turibdi.
Yoshlar bandligini ta’minlash va ularga munosib daromad olishi uchun sharoit yaratib berish eng muhim vazifa hisoblanadi. Yana bir bor takrorlayman, bu boradagi eng katta imkoniyat va zaxiramiz — bu tadbirkorlik, ayniqsa, kichik va o‘rta biznes. Aytish joizki, birinchi chorakda 12 ming nafar ‘yoshlar daftari’ga kirganlarga 255 milliard so‘m kredit ajratildi.
Lekin ular mustaqil ravishda tadbirkor bo‘lib, oyoqqa tura oladimi, degan savol hokimlar, sektor rahbarlari va sohaga mas’ullarni har kuni o‘ylantirishi kerak. Misol uchun, joriy yilning o‘tgan davrida Jondor tumanida 813 nafar yoshga kredit ajratilgan (respublika bo‘yicha o‘rtacha 158 nafar)”, – dedi Shavkat Mirziyoyev.
Bundan avval Mirziyoyev yoshlar bilan ishlashni eplay olmagan bir qator amaldorlarni ishdan olgani, SSP raisini “1+1” dasturi orqali 1 mln yigit-qizni qamrab olmasa, ishdan olinishi haqida ogohlantirgani hamda 2021-yilning birinchi choragida 33 ming nafar yoshga tadbirkorlik faoliyati uchun 800 milliard so‘m kredit ajratilganini ma’lum qilgani haqida xabar qilingandi.
Izoh (0)