Prezident Shavkat Mirziyoyev 13-aprel kuni yoshlar masalalariga bag‘ishlab o‘tkazilgan videoselektor yig‘ilishida Savdo-sanoat palatasi rahbari Adham Ikromov va bandlik va mehnat munosabatlari vaziri Nozim Husanovga vaziyatni o‘nglash uchun uch oy muddat berdi. Bu haqda “Daryo” muxbiri xabar bermoqda.
Avvalroq videoselektor davomida prezident yoshlar bilan ishlashni lozim darajada tashkil etmagan, yoshlar jinoyatchiligining oldini olish bo‘yicha zarur choralar ko‘rmagan, yoshlar tadbirkorligini qo‘llab-quvvatlashda sustkashlikka yo‘l qo‘ygan bir qator amaldorlar lavozimidan ozod etilishini e’lon qilgani haqida xabar berilgan edi.
Shuningdek, davlat rahbari Savdo-sanoat palatasi (SSP) raisi Adham Ikromovga tadbirkor yoshlar bilan ishlashni tizimli tashkil etmagan uchun palataning Buxoro va Surxondaryo viloyatlaridagi rahbarlarini lavozimidan bo‘shatish haqida topshiriq bergan.
“Adham Ikromov, biznes-ombudsman Qosimov, bandlik va mehnat munosabatlari vaziri Husanov, Saidqahhor Xolxo‘jayev va ‘Mikrokreditbank’ raisi Bo‘tayev qat’iy ogohlantirilib, ularga vaziyatni o‘nglashi uchun uch oy muddat beriladi”, — deb ta’kidlagan prezident Shavkat Mirziyoyev.
“Ikramov, Qosimov ‘1+1’ dasturi orqali 1 million yoshlarni qamrab olib, natija ko‘rsatishi shart. Aks holda lavozimidan olinadi”, — dedi davlat rahbari.
Izoh (0)