Jizzax shahridagi Mustaqillik ko‘chasining “Oybek” nomli xususiy klinika oldidan o‘tgan qismida 13-aprel kuni tong soat 07:40 atrofida “Toza hudud” korxonasiga tegishli, Isuzu rusumli chiqindi tashuvchi yuk mashinasining 100 litr hajmli metan gaz balloni portlagan. Bu haqda Bosh prokuratura matbuot xizmati “Daryo”ga ma’lum qildi.
Hodisa oqibatida piyodalar o‘tish joyida yo‘lni kesib o‘tish maqsadida turgan ikki kishi — 1982-yilda tug‘ilgan erkak ikkala oyog‘ining jarohatlari tashxisi bilan va uning 2014-yilda tug‘ilgan o‘g‘li ikkala oyog‘ining sinishi tashxisi bilan Respublika shoshilinch tibbiy yordam ilmiy markazining Jizzax filiali jonlantirish bo‘limiga yotqizilgan. Qayd etishlaricha, ularga temir parchalar kuchli zarb bilan kelib tekkan.
Shuningdek, portlab ketgan gaz ballon parchalari chiqindi tashuvchi mashina bilan bir yo‘nalishda harakatlanib kelgan Spark va Cobalt’ga, qarama-qarshi yo‘nalishdagi Nexia’ga zarar yetkazgan.
“Maxsus yuk avtoulov haydovchisi 13-aprel kuni soat taxminan 07:15 da Sharof Rashidov tumani ‘Tuyoqli’ mahallasi hududida joylashgan ‘Gulida Qudratova’ kompaniyasining gaz quyish shoxobchasidan 20 kub metan gaz quyilishi ko‘zda tutilgan gaz baloniga ortiqcha 7 kub siqilgan gazni quydirganligi sababli, katta atmosfera paydo bo‘lishi natijasida gaz balon portlaganligi aniqlangan”, — deyiladi Jizzax viloyati prokuraturasi axborotida.
Mazkur holat yuzasidan Jizzax shahar IIO FMB huzuridagi tergov bo‘limi tomonidan tergovga qadar tekshirish harakatlari olib borilmoqda.
Mavzuga doir:
- Sirdaryoda metan zapravkada turgan Damas’ning gaz balloni portlab ketdi (foto)
- Toshkentda Nexia’ning gaz balloni portlashi oqibatida uning atrofidagi 4 ta avtomobil shikastlandi
- Buxoroda Matiz’ning gaz balloni portlashi oqibatida ikkita mashinaga zarar yetdi
- Andijonda Nexia’ga o‘rnatilgan nosoz gaz balloni portladi. Uch kishi voqea joyida vafot etdi
- Buxorodagi avtobus halokati yuzasidan jinoiy ish qo‘zg‘atildi
Izoh (0)