Sirdaryo viloyatining Sardoba tumanida 2020-yilning 1-mayida sodir bo‘lgan texnogen holatdan jiddiy zarar ko‘rgan 3 ta maktabgacha ta’lim tashkiloti jami 7,6 milliard so‘mga tubdan qayta rekonstruksiya qilinib, ishga tushirildi. Bu haqda O‘zA xabar bermoqda.
Qayd etilishicha, “Qo‘rg‘ontepa” MFY hududidagi 4-sonli MTT 1969-yilda, 5-sonli MTT esa 1980-yilda qurilgan. Loyiha qiymati 1 milliard 100 million so‘mni tashkil etgan 160 o‘ringa mo‘ljallangan 1 qavatli 4-sonli MTT Oybek Pardaboyev rahbarligidagi “Faol baraka qurilish” MChJ bunyodkorlari tomonidan qayta rekonstruksiya qilinib, to‘liq jihozlandi.
Shu mahalladagi 5-sonli MTT “Koson temir yo‘l qurilish” MChJ bunyodkorlari tomonidan tubdan qayta rekonstruksiya qilinishi, qo‘shimcha qurilishi va jihozlanishi uchun 3 milliard 300 million so‘m mablag‘ sarflandi.
1978-yilda qurilgan “Do‘stlik” MFY hududidagi 10-sonli MTT suv toshqinidan jiddiy zarar ko‘rgandan so‘ng, Excellent Construction Bussines mas’uliyati cheklangan jamiyati quruvchilari tomonidan bugungi zamon talablari asosida tubdan qayta rekonstruksiya qilindi.
180 o‘ringa mo‘ljallangan 2 qavatli ushbu bino yangi yumshoq va qattiq mebel, boshqa barcha zarur jihozlar bilan to‘liq ta’minlangan bo‘lib, obyektda amalga oshirilgan barcha ishlar uchun 3 milliard 200 million so‘mlik mablag‘ sarflandi.
“Ayni paytda tumanimizda 14 ta maktabgacha ta’lim tashkilotlari mavjud bo‘lib, 5 ming 572 nafar maktab yoshigacha bo‘lgan sardobalik o‘g‘il-qizlarimizning 3 956 nafari maktabgacha ta’lim tashkilotlari bilan qamrab olingan. Bu 71 foizdan ortiqroq degani. Ammo sa’y-harakatlar to‘xtagani yo‘q. Qamrovni yanada kengaytirmoqchimiz”, — degan Sardoba tuman maktabgacha ta’lim bo‘limi boshlig‘i Aziz Bekmurodov.
Xabarda aytilishicha, suv toshqinidan zarar ko‘rgan yana 1 ta maktabgacha ta’lim tashkiloti yangidan qurilib bitkazilmoqda. Qisqa fursatlarda u ham foydalanishga topshiriladi.
Avvalroq Sardoba tumanida “Shayx Nazrulloxon eshon” jome masjidi qaytadan qurilib, foydalanishga topshirilgani, Sardoba toshqinidan jabrlangan aholi uchun qurilgan uylar narxi 855,4 milliard so‘mni tashkil etgani haqida xabar berilgan edi.
Izoh (0)