Uzcard va Humo to‘lov tizimlari hamkorlik to‘g‘risidagi memorandumni imzoladi. Bu haqda Yagona umumrespublika protsessing markazi Spot’ga ma’lum qildi.
Ma’lum qilinishicha, kompaniyalar bir nechta qo‘shma loyihalarni ishga tushiradi. Ulardan biri infratuzilmalarni bosqichma-bosqich integratsiyalashdir. Terminallar 2021-yil oxirigacha har ikkala turdagi kartalarni qabul qilishni boshlashi kutilmoqda.
“Bu karta egalari, banklar va biznes egalariga sezilarli foyda keltiradi. Xaridorlarga savdo nuqtasi qaysi terminallardan foydalanishi haqida o‘ylashning hojati yo‘q, tadbirkorlar esa ikkala kartadan to‘lovlarni bitta terminal orqali qabul qilishlari mumkin”, — degan Humo direktori Shuhratbek Qurbonov.
Shu bilan birga, uning aytishicha, Uzcard va Humo raqobat muhitini yaratishda davom etadi.
“Hamkorlik moliyaviy xizmatlarni fuqarolar uchun yanada qulayroq va yengil qiladi. Bu o‘z navbatida, kompaniyalarni yangi texnologiyalarni ishlab chiqish, to‘lov biznesini rivojlantirish va xizmat ko‘rsatish sifatini oshirishga turtki beradi”, — degan Uzcard direktori Farrux Ziyayev.
Uning so‘zlariga ko‘ra, bu ham adolatli raqobatni rivojlantirishga va bozorda yangi ishtirokchilar paydo bo‘lishiga yordam beradi.
Markaziy banki raisi Mamarizo Nurmuratov 2020-yilning sentabrida Humo va Uzcard kartalari o‘zaro integratsiyalanib, ushbu karta egalari ikkala to‘lov tizimining bankomatlari va terminallaridan foydalanishlari mumkin bo‘lishini ma’lum qilgandi.
Humo va Uzcard to‘lov tizimlarini integratsiyalashtirish Vazirlar Mahkamasining 2020-yil 20-iyundagi “O‘zbekiston respublikasida ‘yashirin iqtisodiyot’ ulushini qisqartirish chora-tadbirlari to‘g‘risidagi qarorida ham ko‘zda tutilgan.
Mavzuga doir: Uzcard kompaniyaning yangi yo‘nalishini e’lon qildi
Izoh (0)