Buxoroda tadbirkorning 23,6 million so‘m pulini o‘tkazib berish evaziga 2,3 million so‘m olgan mansabdor ushlandi, deb xabar bermoqda Bosh prokuratura huzuridagi Iqtisodiy jinoyatlarga qarshi kurashish departamenti matbuot xizmati.
Ma’lum qilinishicha, viloyat Uy-joy kommunal xizmat ko‘rsatish boshqarmasi Buxoro shahar bo‘limi boshlig‘i S.X. “A.O.” MChJ rahbarining ishonchiga kirib, shahardagi ko‘p qavatli uylarda bajarilgan ta’mirlash ishlari uchun to‘lanishi lozim bo‘lgan 23,6 million so‘mni jamiyat hisob-raqamiga o‘tkazib berish evaziga 2,3 million so‘mni firibgarlik yo‘li bilan olgan.
Pullarni olayotgan vaqtida departament hamda DXXning Buxoro viloyati boshqarmalari tadbirkorlik subyektlarining huquq va manfaatlarini himoya qilish yuzasidan o‘tkazgan tezkor tadbirda ashyoviy dalillar bilan ushlangan.
Holat yuzasidan S.X.ga nisbatan Jinoyat kodeksining 25,168-moddasi (firibgarlik) va 28,211-moddasi (pora berish) bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq Buxoroda tezroq kredit olish uchun bank boshqaruvchisiga 100 dollar pora bergan fuqaro jinoyat ustida qo‘lga olingani, Surxondaryoda 10 million so‘m evaziga er-xotin ajrimini tezlashtirishni va’da qilgan soxta advokat ushlangani, Toshkent viloyati “SES” bo‘lim mudirlari 400 dollar pora bilan qo‘lga tushgani haqida xabar berilgan edi.
Izoh (0)