Prezident Shavkat Mirziyoyev raisligida o‘tkazilgan yig‘ilishda davlat rahbari rektorlarning yoshlar bilan ishlashdagi faoliyatida mutlaqo yangi tizim yaratilishini ta’kidladi, deya xabar bermoqda “Daryo” muxbiri.
“Har bir oliygoh yon-atrofidagi kamida 5-10 tadan shahar mahallasi uchun ma’naviyat markazi va madaniyat o‘chog‘i bo‘lishi kerak. Oliy o‘quv yurtlari atrofidagi mahallalardagi uyushmagan yoshlarni xorijiy tillar, kompyuter savodxonligi, sport, madaniyat va kitobxonlik to‘garaklariga jalb etadi, ularning ma’naviy dunyoqarashini shakllantirishga ko‘maklashadi.
Shuningdek, o‘zlariga biriktirilgan mahalladagi ‘yoshlar daftari’dagi yoshlar uchun oliygohlarga kirish bo‘yicha bepul tayyorlov kurslarini tashkil etadi.
Bundan tashqari, uyushmagan yoshlar bilan manzilli ishlash uchun yuqori kurslarda o‘qiydigan 2 nafar namunali talaba 1 nafar uyushmagan yoshning ijtimoiy faolligini oshirishga yordamlashadi. Ushbu tizim orqali 135 ta oliygoh kamida o‘rtacha ming nafardan yoshlarni qamrab olganda ham, kamida 100 ming nafar yoshlarga hayotda o‘z o‘rnini topishida ko‘mak bo‘ladi. Shu tizim yo‘lga qo‘yilsa, shaharlarda vaziyat, albatta, o‘zgaradi, adashgan yoshlar soni keskin kamayadi”, – dedi Shavkat Mirziyoyev.
Prezident mutasaddi rahbarlar bu ishlarni qishloq joylaridagi kollej va texnikumlarda ham yo‘lga qo‘yish kerakligini aytdi.
“Abduvohidov, Toshqulov, Jo‘raboyev, Kenjayev 15 kun muddatda bittadan oliygoh, texnikum va kollejga o‘zlari borib, ushbu tajribani namuna sifatida joriy qiladi. Bunda, yuqori natija ko‘rsatgan rektor, texnikum va kollej rahbarlariga 50 foizgacha ustama to‘lab berish tartibi joriy etiladi. Abduvohidov, Toshqulov har hafta oliygoh rektorlari, texnikum va kollej rahbarlarining yoshlar bilan ishlash faoliyatini muhokama qilib boradi.
Oliygoh rektorlari, texnikum va kollej rahbarlarining mahallada, yotoqxonalarda, madaniyat maskanlarida qilayotgan ishlari televideniye va ommaviy axborot vositalarida yoritilishi kerak”, – dedi davlat rahbari.
Bundan avval Shavkat Mirziyoyev ijarada yashayotgan talabalarga 1-maydan boshlab ijara to‘lovining yarmi davlat tomonidan qoplab berilishi, “yoshlar daftari”dagi yoshlar va mehribonlik uyi tarbiyalanuvchilariga haydovchilik guvohnomasini olish, bir oylik harbiy xizmatni o‘tash xarajatlari budjetdan to‘lab berilishi hamda 2021-yilning 1-may va 1-iyunidan boshlab tadbirkorlar va ishsiz yoshlarga bir qator imtiyozlar berilishini ma’lum qilgani haqida xabar berilgandi.
Izoh (0)