Навоий прокуратураси «битта укол оқибатида» вафот этган 36 ёшли аёлнинг иши юзасидан текширув ўтказмоқда

Ижтимоий тармоқларда Навоийда «Шифокорлар сабаб биз онасиз қолдик» деган ёзувни кўтарган ҳолда мурожаат йўллаган болаларнинг иши шаҳар прокуратураси томонидан ўрганилмоқда, деб хабар беради Бош прокуратура.

Маълум қилинишича, 25 март куни Навоий вилояти Навбаҳор туманида яшаган 36 ёшли аёл вилоят Перинатал марказининг жонлантириш бўлимида вафот этган. Мазкур ҳолат юзасидан Навоий шаҳар прокуратураси томонидан терговга қадар текширув ҳаракатлари олиб борилмоқда.

Текширишда судга оид комиссион тиббиёт экспертизаси тайинланган. Таъкидланишича, натижалари ҳақида хабар қилинади.

Вилоят Соғлиқни сақлаш бошқармаси ҳам ушбу ҳолатга муносабат билдирган бўлиб, унга кўра, 16 март куни Навоий вилоят перинатал маркази гинекология бўлимига 12 ҳафталик ҳомиласининг нобуд бўлгани билан 1985 йилда туғилган О.Ф. мурожаат қилган.

Бемор бўлимда даволаш-ташхислаш стандартлари асосида тўлиқ текширувлардан ўтказилиб, ҳомиланинг уч ҳафтадан ортиқ ривожланмай қолгани, умумий қон таҳлилида лейкоцитлар миқдори нормадан ошгани инобатга олиниб, септик асоратларнинг олдини олиш ва антибиотико-профилактика мақсадида «Цефтриаксон» дори воситасининг 1,0 грамми мушак орасига синамасидан сўнг, инъекция ўтказиш тавсия берилган.

16 март куни соат 17:50 лар атрофида муолажа ҳамшираси томонидан ушбу дори воситаси билан ўнг билак соҳасига синама қўйгандан кейин тўсатдан анафилактик реакция, анафилактик шок ва клиник ўлим ҳолати кузатилган. Ўтказилган тезкор реанимацион чора-тадбирлардан сўнг, юрак фаолияти тикланиб, реанимация бўлимида узайтирилган сунъий нафас бериш аппаратида интенсив даво муолажалари давом эттирилган.

Даволаш жараёнида 17, 23 ва 25 март кунлари мамлакатнинг малакали анестезиолог ва реаниматологлари томонидан кўрилиб, керакли тавсиялар берилган ва буюрилган тавсиялар асосида даво муолажалари олиб борилган.

Ўтказилган интенсив даво муолажаларига қарамасдан 25 март куни бемор О.Ф.да биологик ўлим қайд қилинган.