Favqulodda vaziyatlar vazirining matbuot kotibi Murod Sodiqov O‘zbekistonda zararli chigirtkalar bilan kurashish mavsumi boshlanganini ma’lum qildi.
Favqulodda vaziyatlar hamda Qishloq xo‘jaligi vazirliklari bilan o‘zaro hamkorlikda 2021-yilda hashoratlar tahdid qilishi mumkin bo‘lgan taxminiy ekin maydonlari hisoblab chiqilgan. Bu deyarli 600 ming gektar qir-adir yerlardir.
“Ayni kunlarda chigirtka tarqalishi mumkin bo‘lgan yerlarda kimyoviy ishlov berish tadbirlari olib borilmoqda. Bularda Xorazm, Qashqadaryo va Surxondaryo viloyatlarini misol tariqasida keltirish mumkin”, — deydi Sodiqov.
Ta’kidlanishicha, bu kabi tadbirlar tez kunlarda Buxoro, Samarqand va Sirdaryo viloyatlari ham boshlanadi. Farg‘ona vodiysi viloyatlarida esa profilaktik tadbirlar may oyining boshida o‘tkazilishi rejalashtirilgan.
Ma’lum qilinishicha, ushbu profilaktik jarayonlarga o‘nlab deltaplanlar va yuzlab qishloq xo‘jaligi texnikalari jalb etilmoqda.
Avvalroq Somalida cho‘l chigirtkalarining hujumi sabab favqulodda holat e’lon qilingani, 2020-yil dekabr oyida Yaponiyaning O‘rta Osiyo mamlakatlari va Afg‘onistonga chigirtkadan himoyalanish maqsadida 7,5 million dollar ajratishi xabar qilingandi.
Izoh (0)