“Orient Finans” XATB kredit reytingining “Barqaror” prognozi bilan “B” darajasidan “B+” darajasigacha oshirilishi, bank tomonidan pandemiya sharoitida muammoli aktivlar bo‘yicha zaxiralarni shakllantirish uchun xarajatlar me’yorida bo‘lishi ta’minlangani va bank kapitali muvozanatli boshqarilgani bilan izohlanadi.
S&P Global Ratings fikriga ko‘ra, “Orient Finans” XATB davlatga tegishli bo‘lmagan va moliyaviy xizmatlar bozorida unchalik katta ulushni egallamagan bank bo‘lishiga qaramasdan, O‘zbekistondagi kichik va o‘rta banklardan farqli ravishda korporativ mijozlarning keng bazasiga ega. Bank Vazirlar Mahkamasining tashabbusidagi yirik loyihalarni moliyalashtirishda faol ishtirok etadi. Ushbu loyihalarga ajratilgan kreditlarning sifati esa ijobiy ekanligi bilan ajralib turishini ta’kidlab o‘tish joiz.
“Orient Finans” XATB likvidlilik ko‘rsatkichlariga munosib baho berildi. 2021-yil 1-mart holatiga ko‘ra, likvidli aktivlarning jami aktivlardagi ulushi qariyb 21,5 foizni tashkil etdi va bu O‘zbekiston banklariga nisbatan taqqoslaganda yuqori ko‘rsatkich hisoblanadi. O‘tgan bir necha oylar davomida esa bank aktivlarida salbiy o‘zgarishlar kuzatilmadi.
“Barqaror” prognozining berilishi “Orient Finans” XATB yetarli kapital zaxiralariga ega ekanligi va daromadni oshirish salohiyati yuqoriligi bilan yaqin 12—18 oy davomida o‘zining kreditlash imkoniyatini yetarlicha ta’minlab tura olishini anglatadi.
S&P Global Ratings xalqaro reyting agentligining tahlilchilari tomonidan COVID-19 pandemiyasi sharoitida ham O‘zbekiston bank tizimining ko‘rsatkichlari barqaror darajada saqlanib qolinayotgani alohida ta’kidlab o‘tildi.
Shuningdek, O‘zbekiston iqtisodiyotiga COVID-19 pandemiyasining salbiy ta’sirini oldini olish bo‘yicha zarur choralar ko‘rib borilayotgani ko‘rsatib o‘tildi. O‘zbekiston hukumati tomonidan amalga oshirilayotgan chora-tadbirlar mamlakat iqtisodiyoti va uning tarmoqlariga pandemiyaning salbiy ta’sirini yumshatishga ko‘mak bermoqda.
Reklama huquqi asosida.
Izoh (0)