Farg‘onalik otaxonlar velosipedda O‘zbekiston bo‘ylab sayohatga chiqishdi

Farg‘onalik yigirma yetti nafar otaxon velosipedda O‘zbekiston bo‘ylab sayohatga chiqdi, deya xabar berdi “Daryo” muxbiri.

Mazkur sayohat orqali yurtimizda ichki turizmni rivojlantirishga hissa qo‘shishni niyat qilgan otaxonlar 31-mart kuni Qo‘shtepa tumanidan Samarqand shahriga yo‘l olgan.

Otaxonlar Qo‘qon—Toshkent—Guliston—Jizzax—Samarqand yo‘nalishi bo‘yicha sayohatni amalga oshirishni rejalashtirgan. Yo‘l-yo‘lakay ular mazkur hududlardagi tarixiy obidalar va diqqatga sazovor joylarni ziyorat qiladi.

Sayohatchi otaxonlar soatiga o‘rtacha 20 kilometr yo‘l yurib, 4-aprel kuni Samarqand shahriga yetib borishni maqsad qilgan.

Ma’lumot uchun, sayohatchi otaxonlarning eng yoshi 60 yoshni qarshilagan bo‘lsa, eng keksasi 80 yoshga to‘lgan.