Emlash kurslarini to‘liq tamomlagan O‘zbekiston fuqarolariga emlanganlik haqida QR-kodli sertifikat beriladi.
“Rasmiy xabarlar” Telegram-kanalida Xitoyning Zhifei Longcom Biopharmaceutical Co. Ltd kompaniyasi tomonidan O‘zbekistonda 3-bosqich sinovlari o‘tkazilgan, o‘zbekistonlik mutaxassislar hammuallifligida yaratilgan ZF-UZ-VAC 2001 vaksinasini amaliyotda qo‘llash to‘g‘risida ruxsatnomasining surati e’lon qilindi.
Hujjatni Xitoy fanlar akademiyasi Mikrobiologiya instituti, Sog‘liqni saqlash milliy komissiyasi huzuridagi Tibbiyot texnologiyalarini rivojlantirish bo‘yicha ilmiy tadqiqot markazi maxsus ishchi guruhi tasdiqlagan.
Mazkur vaksina O‘zbekiston Sog‘liqni saqlash vazirligi Dori vositalari, tibbiy buyumlar va tibbiy texnika ekspertizasi va standartizatsiyasi davlat markazi tomonidan ro‘yxatdan o‘tkazilgani to‘g‘risidagi guvohnoma:
Ta’kidlanishicha, vaksina olgan fuqaro, qanday vaksina bilan emlanishidan qat’i nazar, agar u ikki (AstraZeneca) yoki uch marotaba (ZF-UZ-VAC 2001) emlanib, to‘liq emlash kursini tamomlagan bo‘lsa, unga emlanganlik haqida, maxsus xalqaro talablarga mos keladigan QR-kodli sertifikat beriladi.
Aholini koronavirusga qarshi emlash tadbirlari 1-apreldan boshlandi. O‘zbekistonda bugungi kunda 1 million 660 ming doza vaksina bor. Ularning 660 ming dozasi COVAX jamg‘armasi tomonidan olib kelingan AstraZeneca vaksinasi, 1 million dozasi O‘zbekiston–Xitoy hamkorligida ishlab chiqilgan ZF-UZ-VAC 2001 vaksinasi.
Aholini ushbu vaksinalar bilan emlash bir paytning o‘zida amalga oshiriladi. Bunda emlanuvchi birinchi emlanishni qaysi vaksina bilan boshlasa, ikkinchisini ham aynan o‘sha vaksina bilan yakunlaydi. AstraZeneca vaksinasi bilan 2 marotaba, ZF-UZ-VAC 2001 vaksinasi bilan 3 marotaba emlash ko‘zda tutilmoqda. Ya’ni, vaksinatsiya ikki xil vaksinada ikki xil amalga oshiriladi. Shuningdek, O‘zbekistonda xususiy klinikalarga COVID-19’ga qarshi pulli emlash o‘tkazishga ruxsat beriladi.
Nurmat Otabekovning o‘zi istalgan vaksina bilan jon deb emlanishini ma’lum qilgan.
Eslatib o‘tamiz, bundan avval Farg‘ona va Samarqandda aholini koronavirusga qarshi emlash tadbirlari boshlangani haqida xabar berilgan, O‘zbekiston Sog‘liqni saqlash vazirligi qayerda vaksinatsiya jarayonlari o‘tkazilishi haqida ma’lumotni e’lon qilgan.
Izoh (0)