Amerikaning Moments in Time auksionida Chevrolet Suburban’ning g‘ildiraklar diskasi uchun mo‘ljallangan plastik “kolpagi” 150 ming dollarga sotilmoqda. Avtomobil elementining bu qadar qimmatligiga u Notorius B.I.G. taxallusi bilan tanilgan mashhur musiqachi Kristofer Uolles otib ketilgan mashinada bo‘lgani bilan izohlanmoqda, deb xabar beradi Motor.
1997-yilda amerikalik rep-qo‘shiqchi Notorious B.I.G. Los-Anjeles ko‘chalari bo‘ylab ijaraga olingan Chevrolet Suburban’da harakatlanayotgan bo‘lgan. Musiqachining yo‘ltanlamasi chorrahalardan birida to‘xtaganida uning yoniga boshqa bir avtomobil yaqinlashib kelgan va mashina ichidagilar o‘q uza boshlagan. Hujum oqibatida Kristofer Uolles qattiq jarohat olib, vafot etgan. Jinoyatchilar hozirga qadar topilmagan.
Sotuvchining so‘zlariga ko‘ra, mazkur fojiadan so‘ng, Suburban’ning g‘ildirak diskalaridan Think B.I.G. March 25 1997 yozuvli yorliq yopishtirilgan plastik qopqoqlar yechib olingan. Shu orqali hip-hop qo‘shiqchi uch haftadan keyin taqdim etilishi kerak bo‘lgan o‘zining yangi Life After Death albomining piar-aksiyasini o‘tkazib kelgan. Sotuvga qo‘yilgan qopqoqda yorliqning bir qismi saqlanib qolgan.
Sotuvchi plastik detal uchun 150 ming dollar so‘ramoqda. Bu pulga yangi Mercedes-Benz S-Class xarid qilish mumkin.
Avvalroq AQShda noyob Lamborghini Countach 425 ming dollar narxida sotuvga qo‘yilgani to‘g‘risida xabar berilgandi.
Izoh (0)